BAKI, AzerVoice, Fərid Mikayılov
İsrailin Qəzza zolağına son 24 saatda həyata keçirdiyi hücumlar nəticəsində həyatını itirən fələstinlilərin sayı 61 nəfər artaraq 62 min 622-yə yüksəlib.
AzerVoice xəbər verir ki, bu barədə Fələstin Səhiyyə Nazirliyi məlumat yayıb.
Nazirliyin açıqlamasına görə, son sutkada Qəzza zolağındakı xəstəxanalara 61 ölü və 308 yaralı gətirilib.
Məlumata əsasən, İsrail ordusu 19 yanvarda əldə edilən atəşkəsi pozaraq 18 martdan etibarən yenidən hücumlara başlayıb. Bu müddət ərzində 10 min 778 nəfər həlak olub, 45 min 632 nəfər yaralanıb.
Nazirliyin açıqlamasında, xüsusilə ABŞ və İsrail tərəfindən yönləndirilən yardım paylama məntəqələrində fələstinlilərin hədəfə alındığı vurğulanır. 27 maydan bəri bu hücumlarda 2 min 76 nəfər öldürülüb, 15 min 308 nəfər yaralanıb. Son 24 saatda isə yardım almağa çalışan 16 nəfərin öldürüldüyü, 111 nəfərin yaralandığı bildirilib.
Qəzzada tətbiq edilən qida blokadası nəticəsində son bir gündə daha 8 nəfər aclıqdan dünyasını dəyişib. Beləliklə, aclıq səbəbindən ölənlərin ümumi sayı 281 nəfərə, onlardan 114-nün uşaq olduğuna diqqət çəkilib.
7 oktyabr 2023-dən bəri davam edən hücumlarda ümumilikdə 62 min 622 nəfər həlak olub, 157 min 673 nəfər yaralanıb.
