BAKI, AzerVoice, Səməd Əyyubov
Qəzza zolağında aclıq və qida çatışmazlığı səbəbindən son 24 saat ərzində ikisi uşaq olmaqla 8 nəfər həyatını itirib.
AzerVoice xəbər verir ki, bu barədə Fələstin Səhiyyə Nazirliyi məlumat yayıb.
“Qəzza son 24 saat ərzində aclıq səbəbindən ikisi uşaq olmaqla daha 8 nəfər həyatını itirib. Beləliklə, aclıqdan ölənlərin sayı 281-ə çatıb, onların 114-ü uşaqlardır” - deyə, məlumatda bildirilib.
Nazirlik vurğulayıb ki, Qəzzada humanitar böhran mühasirə və ərzaq, tibbi ləvazimat çatışmazlığı fonunda daha da dərinləşir. Beynəlxalq ictimaiyyət və yardım təşkilatları bir daha təcili müdaxiləyə çağırılıb.
Ümumdünya Səhiyyə Təşkilatının (ÜST) Fələstin əraziləri üzrə sözçüsü Rik Piperkorn iki gün əvvəl bildirib ki, Qəzzada yaranmış vəziyyət Yaxın Şərqdə ilk rəsmi aclıq halı kimi qeydə alınıb. Onun sözlərinə görə, yalnız iyul ayında 12 mindən çox uşaqda kəskin qida çatışmazlığı diaqnozu qoyulub. Bu, ilin əvvəlindən bəri göstəricilərin 6 dəfə artması ilə ən yüksək aylıq rəqəmdir. Hazırda hər dörd uşağın biri kəskin qida çatışmazlığından əziyyət çəkir və bu vəziyyət həm qısa, həm də uzunmüddətli fəsadlara səbəb ola bilər.
Qeyd edək ki, BMT dəstəyi ilə fəaliyyət göstərən Qida Təhlükəsizliyinə Nəzarət Mexanizminin hesabatında da ilk dəfə olaraq Qəzzanın şimal bölgəsində aclıq vəziyyəti rəsmən elan olunub.
