BAKI, AzerVoice, Nailə Babazadə
İsrail ordusunun bu gün səhər saatlarından etibarən Qəzza zolağına təşkil etdiyi hücumlarda 7 fələstinli həyatını itirib, bir neçə nəfər isə yaralanıb.
AzerVoice xəbər verir ki, xəstəxana mənbələri və görən şahidlərin verdiyi məlumata görə, İsrail ordusu Qəzza zolağında mülki fələstinlilərin yaşadığı çadırlar və evləri hədəf alıb.
Qəzza şəhərində yerləşən Derec məhəlləsində bir evə edilən hava hücumu nəticəsində 2 nəfər ölüb, bir neçə nəfər yaralanıb.
Şəhərin şimalında, Şeyx Rıdvan qəbiristanlığı yaxınlığında məcburi köçkünlərin yaşadığı çadır düşərgəsinə edilən hücumda isə 9 fələstinli yaralanıb.
İsrail hərbi qüvvələri Qəzza zolağının cənubunda yerləşən Xan Yunis şəhərinin qərbindəki Qədisiyyə qaçqın düşərgəsindəki çadırlara da hava zərbəsi endirib. Bu hücumda 2 fələstinli həlak olub.
Xan Yunusun şimalında yerləşən Asda bölgəsində fələstinlilərin yaşadığı daha bir çadırın bombalanması nəticəsində isə 3 nəfər, o cümlədən bir uşaq və bir gənc qız həyatını itirib.
Digər tərəfdən, İsrail ordusu 11 avqustdan bu yana Qəzza şəhərinin cənubundakı Zeytun məhəlləsinə hücumlarını davam etdirir. Hücumlar zamanı robot partlayıcılar və artilleriya atəşləri ilə evlər dağıdılır, bölgə əhalisi zorla didərgin salınır.
