BAKI, AzerVoice, Səməd Əyyubov
Yəmən hökuməti bu gün İranı husilərin nəzarətində olan bölgələrə dəfələrlə zəhərli qazlar və kimyəvi silah istehsalında istifadə olunan maddələri qaçaqmalçılıq yolu ilə göndərməkdə ittiham edib.
AzerVoice xəbər verir ki, hökumətin açıqlamasına görə, İran İslam İnqilabı Keşikçiləri Korpusunun (SEPAH) mütəxəssisləri Yəməndə beynəlxalq miqyasda qadağan olunmuş bu silahların istehsalına yönəlmiş zavodun yaradılmasına birbaşa nəzarət edirlər.
Yəmən informasiya naziri Muammar əl-İryani bildirib ki, etibarlı mənbələr husilərin artıq həmin ölümcül maddələri hazırlamağa və onları ballistik raketlərə, həmçinin pilotsuz uçuş aparatlarına yerləşdirməyə başladığını təsdiqləyib. Nazir vurğulayıb ki, beynəlxalq hüquqla qadağan olunmuş silahların husilərin arsenalına daxil edilməsi yalnız ballistik raketlər və dronlarla məhdudlaşmır, bu, həm bölgə, həm də dünya üçün mülki insanların həyatını təhdid edən “fəlakətli ssenarilər” yaradır.
Əl-İryani əlavə edib ki, İranın müdafiə naziri son açıqlamasında ölkəsinin müxtəlif dövlətlərdə hərbi infrastruktur və silah zavodları qurduğunu açıq şəkildə etiraf edib. Bu isə Yəmən hökumətinin Tehranın öz hərbi proqramının bir hissəsini husilərin nəzarətindəki bölgələrə köçürmək cəhdləri ilə bağlı dəfələrlə səsləndirdiyi xəbərdarlıqlarla üst-üstə düşür. Onun sözlərinə görə, İran layihəsi Yəmən ərazilərini gizli laboratoriyalara çevirməklə zəhərli, kimyəvi və bioloji maddələrin istehsalı və sınağına, həmçinin SEPAH üçün strateji baza yaradılmasına xidmət edir.
Nazir qeyd edib ki, husilərin Yəmənin bir hissəsinə, xüsusilə də sahil bölgələrinə nəzarəti davam etdirməsi getdikcə daha böyük təhlükə yaradır. O, BMT-ni, Təhlükəsizlik Şurasını, Kimyəvi Silahların Qadağan olunması Təşkilatını və bütün beynəlxalq tərəfləri bu qanunsuz fəaliyyətləri dayandırmaq, kimyəvi maddələrin qaçaqmalçılığını araşdırmaq və müvafiq tədbirlər görmək üçün təcili addımlar atmağa çağırıb.
Əl-İryani həmçinin beynəlxalq ictimaiyyəti legitim Yəmən hökumətinə real dəstək göstərməyə, dövlətin bütün ərazilərinə nəzarəti bərpa etməsinə kömək etməyə dəvət edib. Onun sözlərinə görə, bu, yalnız Yəmənin deyil, həm də bölgənin və ümumilikdə dünyanın təhlükəsizliyi və sabitliyi üçün həyati əhəmiyyət daşıyır.
