BAKI, AzerVoice, Səməd Əyyubov
Birləşmiş Ərəb Əmirlikləri İsrailin Dohada HƏMAS rəhbərliyinə qarşı həyata keçirdiyi hücumu qətiyyətlə pisləyib və bunu Qətərə qarşı “qorxaq hücum” adlandırıb.
AzerVoice xəbər verir ki, bu barədə ölkənin Xarici İşlər Nazirliyinin bəyanatında bildirilib.
Bəyanata görə, BƏƏ-nin baş nazir müavini və xarici işlər naziri şeyx Abdullah bin Zayed Al Nəhyan İsrailin Qətər dövlətinə qarşı törətdiyi bu hücumu sərt şəkildə qınayıb. O, hücumun Qətərin suverenliyinin kobud şəkildə pozulması, beynəlxalq hüquqa və BMT Nizamnaməsinə zidd olması, həmçinin regional və beynəlxalq təhlükəsizlik üçün məsuliyyətsiz eskalasiya yaratdığını vurğulayıb.
Nazir beynəlxalq ictimaiyyəti, xüsusilə də BMT Təhlükəsizlik Şurasını İsrailin addımlarını dayandırmaq və bu hücumlara son qoymaq üçün hüquqi və mənəvi öhdəliklərini yerinə yetirməyə çağırıb. Bəyanatda qeyd olunur ki, İsrailin bu hərəkətləri bölgədə və dünyada təhlükəli nəticələrə gətirib çıxara bilər.
Xatırladaq ki, bundan əvvəl Səudiyyə Ərəbistanı da İsrailin hücumunu pisləyərək, Qətərin suverenliyinin pozulmasını qınamış və Dohanın təhlükəsizliyi üçün atdığı addımlara dəstəyini ifadə etmişdi.
“Əl-Cəzirə” telekanalı HƏMAS-dakı mənbələrə istinadən bildirib ki, Xəlil əl-Həyyənin rəhbərlik etdiyi nümayəndə heyəti İsrailin Dohada təşkil etdiyi sui-qəsd cəhdindən xilas olub.
