BAKI, AzerVoice, Nailə Babazadə
İsrailin blokadasını yarmaq üçün Qəzzaya doğru irəliləyən Azadlıq Flotiliyası Tunisdən yola düşmək üçün son hazırlıqlarını görür.
AzerVoice xəbər verir ki, Azadlıq Flotiliyasına Tunisdən qoşulacaq qayıqlarda yer alacaq fəallar yerli vaxtla saat 17:00-da paytaxt Tunisdəki Sidi Bu Səid limanında toplanmağa başlayıblar.
Donanmanı yola salmaq üçün limana toplaşan yüzlərlə tunisli Qəzzaya və donanmaya dəstək mesajları veriblər.
Azadlıq Flotiliyasında “Azadlıq Donanması Koalisiyası”, “Qlobal Qəzza Hərəkatı”, “Məğrib Sumud Karvanı” və Malayziya mərkəzli “Sumud Nusantara” təşkilatları yer alır. Donanmada 40-dan çox ölkədən yüzlərlə fəal qayığa minib Qəzzaya doğru yola düşür.
Qeyd edək ki, dünən İsrailin Qəzzaya tətbiq etdiyi blokadanı yarmaq məqsədilə yola çıxmağa hazırlaşan Azadlıq (Sumud) Flotiliyasına yenidən PUA hücumu edilib. Hücum nəticəsində xəsarət olmasa da, bir gəmidə yanğın baş verib və Tunisli xilasedicilər tərəfindən söndürülüb. Hadisə flotiliyanın ikinci böyük gəmisi "Alma"ya qarşı limanda həyata keçirilib. Hücuma etiraz olaraq Sidi Busaid limanına çoxsaylı tunisli fəal toplaşıb. Tunis Daxili İşlər Nazirliyi isə PUA hücumu iddialarını təkzib edib.
