BAKI, AzerVoice, Fərid Mikayılov
Qətərin Baş naziri Şeyx Məhəmməd bin Əbdürrəhman Al-Tani İsrailin Doha şəhərinə təşkil etdiyi hava hücumunu “dövlət terroru” adlandıraraq, İsrailin Baş naziri Benyamin Netanyahunun ədalət qarşısına çıxarılmalı olduğunu bəyan edib.
AzerVoice xəbər verir ki, çərşənbə günü çıxış edən Netanyahu, Qətəri “terrorçuları himayə etməkdə” günahlandıraraq, onları ya ölkədən çıxarmağa, ya da mühakiməyə verməyə çağırmışdı. Əks halda hücum edəcəklərini bildirmişdi.
Buna cavab verən Qətər Baş naziri Netanyahunu Beynəlxalq Cinayət Məhkəməsi tərəfindən axtarılan şəxs kimi xatırladaraq, onun təhdidlərinin qəbuledilməz olduğunu vurğulayıb.
Al-Tani bildirib ki, Dohada Fələstin rəsmilərinin danışıqlar apardığı faktı həm İsrail, həm də ABŞ tərəfindən çoxdan bilinirdi. Baş nazir hücumu Qətərin suverenliyinə açıq zərbə və “minimum etik dəyərlərin pozulması” kimi qiymətləndirdi. O, ABŞ-ın Qətəri bu hücum barədə “çox gec” xəbərdar etdiyini də əlavə edib.
Qətər Xarici İşlər Nazirliyi də bəyanat yayaraq, Netanyahunun açıqlamalarını “qorxaqlığın üzərinə pərdə çəkmək cəhdi” adlandırdı və gələcəkdə dövlət suverenliyinə yönələn açıq təhdidləri kəskin şəkildə pislədi.
Baş nazir qeyd edib ki, hücum Qəzzada saxlanılan girovlarla bağlı ümidləri də puça çıxarıb.
“Bu hücum səhəri mən girov ailələrindən biri ilə görüşürdüm. Onların yeganə ümidləri vasitəçilik idi. İndi o da məhv edilib.”
HƏMAS hücum nəticəsində yüksək rütbəli nümayəndələrinin sağ qaldığını açıqlasa da, təşkilatın beş üzvü həlak olub. Ölənlər arasında HƏMAS lideri Xəlil əl-Həyyənin oğlu Hammam əl-Həyyə və yaxın müşavirləri də var. Hücumda Qətərli təhlükəsizlik əməkdaşı Bədr Səid Məhəmməd əl-Humaidi də həyatını itirib.
İsrail son üç gündə Qətərlə yanaşı Qəzza, Livan, Yəmən, Suriya və Tunisdə də hücumlar həyata keçirib. Hadisələrdən sonra region ölkələri Dohaya dəstək üçün birləşməyə başlayıb.
Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan bölgənin kollektiv cavab verməli olduğunu bildirərək, yaxın günlərdə Dohada ərəb-islam sammitinin keçiriləcəyini açıqlayıb.
