BAKI, AzerVoice
Küveyt Daxili İşlər Nazirliyi ölkədə məscidlər və ibadət yerlərinə yönəlmiş partlayıcı-təxribat əməliyyatı hazırlayan bir əcnəbi mənşəli sakin (müvəqqəti yaşayan) saxlandığını açıqlayıb.
AzerVoice xəbər verir ki, nazirliyin bazar ertəsi gecə yaydığı bəyanatda bildirilib ki, Dövlət Təhlükəsizliyi Xidməti qabaqlayıcı əməliyyat çərçivəsində planı ifşa edib.
«Ölkənin təhlükəsizliyini qorumaq və sabitliyini təmin etmək məqsədilə aparılan intensiv qabaqlayıcı tədbirlər nəticəsində Dövlət Təhlükəsizliyi Xidməti dini məkanlara hücum etmək niyyətində olan qadağan olunmuş təşkilata mənsub əcnəbi mənşəli bir sakini həbs edə bilib. Araşdırmalar zamanı onun partlayıcı qurğular hazırlamaq üçün istifadə olunan bir sıra texniki avadanlıq və materiallar, eləcə də onların hazırlanma və istifadə üsulları yaşayış yerində aşkar edilib» -nazirliyin bəyanatında deyilir.
Nazirlik əlavə edib ki, bu, planın ciddiliyini və təhlükəsini təsdiqləyir və ölkənin əmin-amanlığına, vətəndaşların və sakinlərin təhlükəsizliyinə zərər vurmaq niyyətində olan hər kəsə qarşı qətiyyətlə mübarizə aparılacaq. Bəyanatda vurğulanır: «Daxili İşlər Nazirliyi hər kəsə xəbərdarlıq edir və belə terror planlarına heç vaxt imkan verilməyəcəyini, qarşısının güclə alınacağını bəyan edir».
Küveytin yerli KİV-ləri isə mənbələrə istinadən saxlanılan şəxsin «misir vətəndaşı» olduğunu və onun qadağan olunmuş İŞİD təşkilatına mənsub olduğunu bildiriblər. Həmin mənbələrə görə, şübhəli həmçinin etiraf edib ki, dini məkanları hədəfləyən partlayıcı əməliyyat təşkil etməyi planlaşdırıb və partlayıcıların hazırlanmasını öyrənib.
Hadisə ilə bağlı istintaq davam edir və aidiyyəti qurumlar əlavə araşdırmalar aparırlar. Rəsmi açıqlama hücum planının qarşısının alınmasının Küveytin təhlükəsizlik orqanlarının qabaqlayıcı fəaliyyəti sayəsində mümkün olduğunu vurğulayır.
