BAKI,AzerVoice
Şarm əş-Şeyxdə HƏMAS və beynəlxalq vasitəçilər arasında aparılan birinci mərhələ danışıqları müsbət atmosferdə başa çatıb.
AzerVoice xəbər verir ki, Misirin Şarm əş-Şeyx şəhərində keçirilən və İsraillə Fələstin HƏMAS hərəkatı arasında müharibənin dayandırılmasını hədəfləyən ilk danışıqlar mərhələsi bazar ertəsi axşamı başa çatıb. Misir kəşfiyyatına yaxın “Al-Qahira News” telekanalının məlumatına görə, “HƏMAS və vasitəçilər arasında keçirilən ilkin müzakirələr müsbət atmosferdə yekunlaşıb” və görüşlər çərşənbə axşamı da davam edəcək.
Müzakirələr ABŞ Prezidenti Donald Trampın təqdim etdiyi “Qəzza planı” əsasında aparılır. Bu plan münaqişənin dayandırılması, məhbus mübadiləsi və bölgədə sabitliyin bərpasını əhatə edir.
HƏMAS mənbələrinin bildirdiyinə görə, Misir, Qətər, ABŞvə Türkiyədən olan vasitəçilərin iştiraki ilə keçirilən ilk sessiyada cari danişiqlar üçün xəritə və zaman çərçivəsi müəyyən edilib. HƏMAS nümayəndə heyəti vasitəçilərə bildirib ki, İsrailin davam edən bombardmanları əsirlərin azad olunması məsələsində “ciddi maneə” yaradır və əməliyyatların dərhal dayandırılmasının zəruriliyini vurğulayıb.
HƏMAS nümayəndə heyətinə Xəlil əl-Hayya və Zahir Cabarin rəhbərlik edib. Hər iki şəxs ötən ay Qətərin paytaxtı Dohada həyata keçirilən uğursuz sui-qəsd cəhdindən sağ çıxan nümayəndələr sırasındadır.
Danışıqların gündəliyi: atəşkəs, geri çəkilmə və məhbus mübadiləsi
Fələstin mənbələrinin məlumatına görə, danışıqlar atəşkəsin bərqərar olunması, İsrail qoşunlarının Qəzzadan mərhələli şəkildə çıxarılması, əsir və saxlanılan şəxslərin mübadiləsi kimi əsas məsələlərə yönəlib. Həmçinin humanitar yardım və təxirəsalınmaz bərpa tədbirləri də gündəmdədir.
Vasitəçilər dəqiq zaman cədvəli üzərində işləyir və atəşkəsin yerində möhkəmləndirilməsi üçün razılaşma əldə etməyə çalışırlar. Danışıqların bir neçə gün davam edəcəyi və tərəflərin mövqelərində hələ də fərqliliklər olduğu bildirilir.
İsrailin “Kanal 13” televiziya kanalı xəbər verir ki, Baş nazir Binyamin Netanyahu vasitəçilərə Tramp planının müddəalarında heç bir yumşalma göstərməyəcəyini bildirib. İsrail tərəfi qarşıdakı günlərin danışıqlar prosesində həlledici olacağını hesab edir.
Eyni zamanda İsrail mediası danışıqlarda Qəzzanın müharibədən sonrakı idarəçiliyi məsələsinin də gündəmdə olduğunu, bölgədə müvəqqəti beynəlxalq qüvvə formalaşdırılmasının müzakirə edildiyini yazır.
Fələstin mənbələrinə görə, HƏMAS hər hansı razılaşma əldə olunarsa, onun İsrail tərəfindən pozulmaması üçün beynəlxalq zəmanət və effektiv nəzarət mexanizmi yaradılmasını tələb edir.
