BAKI, AzerVoice, Nailə Babazadə
İsrailin maliyyə naziri və ifrat sağçı “Dini Sionizm” partiyasının lideri Betsalel Smotriç Qəzzədə atəşkəs və girovların azad edilməsi barədə əldə olunan razılaşmaya qarşı çıxdığını bəyan edib. Bu barədə məlumatı İsrailin “Ynet” xəbər portalı yayıb.
AzerVoice xəbər verir ki, nazir bildirib ki, razılaşma HƏMAS-ın tam məhv edilməsinə mane olur və bu səbəbdən onun partiyası hökumət müzakirəsində sənədin lehinə səs verməyəcək.
“Məndə qarışıq hisslər var: bir tərəfdən girovların qayıdışına sevinirəm, digər tərəfdən isə azad ediləcək gələcək terror liderlərinin yaratdığı təhlükədən narahatam. Buna görə nə bu razılaşmanı təqdir edə, nə də onun lehinə səs verə bilərik.”-deyə o bildirib.
Smotriçin bu bəyanatı ABŞ Prezidenti Donald Trampın İsrail və HƏMAS arasında Qəzza üzrə sülh planının birinci mərhələsinin imzalanmasını elan etməsindən sonra verilib. Tramp “Truth Social” platformasında yazıb.
“İsrail və HƏMAS ABŞ-ın təklif etdiyi planın birinci mərhələsini imzalayıb. Bu, bütün israilli girovların azad ediləcəyi və İsrailin qüvvələrini razılaşdırılmış xəttə qədər geri çəkəcəyi anlamına gəlir. Bu, davamlı və ədalətli sülhə doğru ilk addımdır.”-deyə Tramp yazıb.
Tramp həmçinin qeyd edib ki, bu razılaşma “ərəb və islam dünyası, İsrail, qonşu dövlətlər və ABŞ üçün böyük bir gündür”, və Qətər, Misir və Türkiyəyə vasitəçilik səylərinə görə təşəkkürünü bildirib.
Baş nazir Benyamin Netanyahu da bu gün hökumətin Qəzzədə atəşkəs razılaşmasını təsdiqləməsi üçün iclas çağıracağını bildirib.
“Bu, İsrail üçün böyük bir gündür,” – deyə Netanyahunun bəyanatında qeyd olunub.
Netanyahunun ofisi əlavə edib ki, baş nazir və Tramp “tarixi nailiyyət” münasibətilə telefonla danışaraq bir-birlərini təbrik ediblər və əməkdaşlığın davam etdirilməsi barədə razılığa gəliblər. Netanyahu, həmçinin, Trampı Knessetdə çıxış etməyə dəvət edib.
Digər tərəfdən, HƏMAS da bəyan edib ki, müharibənin başa çatdırılması, İsrailin Qəzzədən çıxması, humanitar yardımların daxil olması və əsir mübadiləsinin həyata keçirilməsi barədə razılıq əldə olunub. Hərəkat Trampı, eləcə də razılaşmanın zəmanətçiləri olan ərəb və islam ölkələrini İsraili öhdəliklərini tam yerinə yetirməyə məcbur etməyə çağırıb.
