BAKI, AzerVoice
Qətərin milli aviaşirkəti Qatar Airways Avropaya səfər planlaşdıran sərnişinlər üçün 12 oktyabr 2025-ci ildən etibarən qüvvəyə minəcək yeni giriş-çıxış qaydaları ilə bağlı rəsmi xəbərdarlıq yayıb.
AzerVoice xəbər verir ki, məlumata görə, dəyişiklik Avropa İttifaqının (Aİ) Şengen zonası ölkələrində tətbiq olunacaq yeni “Giriş/Çıxış Sistemi” (Entry/Exit System – EES) ilə əlaqədardır. Sistem, Şengen zonasına daxil olan ölkələrə səfər edən qeyri-Aİ vətəndaşlarının sərhədlərdə yoxlanış prosedurlarını rəqəmsallaşdıracaq.
Yeni sistem biometrik qeydiyyatı əhatə edəcək
Qatar Airways-in məlumatında bildirilir ki, yeni sistem pasportların əl ilə möhürlənməsi prosesini əvəz edərək, rəqəmsal biometrik qeydiyyat mexanizmi tətbiq edəcək.
Bu çərçivədə qeyri-Aİ vətəndaşları Şengen zonası ölkələrinə qısamüddətli səfərlər zamanı (Kipr və İrlandiya istisna olmaqla) sərhəddə pasport nömrəsini, barmaq izlərini və şəklini avtomatlaşdırılmış köşklərdə təqdim etməli olacaqlar.
Aviaşirkət sərnişinləri yeni qaydalarla öncədən tanış olmağa və səyahət planlarını Avropa İttifaqının rəsmi saytında yerləşdirilmiş məlumatlara əsasən yoxlamağa çağırıb.
Məqsəd - təhlükəsizlik və səmərəliliyin artırılması
Yeni “Giriş/Çıxış Sistemi”nin məqsədi Avropaya giriş və çıxış proseslərini sürətləndirmək, sərhədlərdə təhlükəsizlik və şəffaflığı gücləndirməkdir.
Sistem həm sərnişinlərin identifikasiyasını asanlaşdıracaq, həm də səyahət məlumatlarının avtomatik idarə olunmasını təmin edəcək.
