İsrail Trampa ali mülki orden təqdim edəcək

İsrail Prezidenti İshaq Hersoq ABŞ Prezidenti Donald Trampa ölkənin ən yüksək mülki ordenini təqdim edəcəyini açıqlayıb. Təltif qərarı Trampın Qəzzada girovların azad edilməsində və müharibənin dayandırılmasında göstərdiyi səylərə görə qəbul edilib. Prezident Hersoqun ofisindən yayılan bəyanatda bildirilib ki, “Tramp tükənməz səyləri ilə təkcə sevdiklərimizin vətənə qayıtmasına kömək etmədi, həm də Yaxın Şərqdə təhlükəsizlik, əməkdaşlıq və sülhə əsaslanan yeni dövrün təməlini qoydu. Onu İsrailin Prezident Şərəf Ordeni ilə təltif etmək mənim üçün böyük şərəf olacaq”.

13 Oktyabr 2025 10:23

BAKI, AzerVoice, Nailə Babazadə

AzerVoice xəbər verir ki,Prezident Hersoqun ofisindən yayılan bəyanatda bildirilib ki, “Tramp tükənməz səyləri ilə təkcə sevdiklərimizin vətənə qayıtmasına kömək etmədi, həm də Yaxın Şərqdə təhlükəsizlik, əməkdaşlıq və sülhə əsaslanan yeni dövrün təməlini qoydu. Onu İsrailin Prezident Şərəf Ordeni ilə təltif etmək mənim üçün böyük şərəf olacaq”.

Məlumata görə, ordenin təqdimetmə mərasimi yaxın aylarda baş tutacaq, lakin Hersoq qərar barədə Trampa onun bu gün İsrailə səfəri zamanı məlumat verəcək. Tramp səfər çərçivəsində Knessetdə çıxış edəcək və girov ailələri ilə görüşəcək.

Eyni gün İsrail və “HƏMAS” arasında Trampın 20 maddəlik sülh planının birinci mərhələsi çərçivəsində girov-məhbus mübadiləsi aparılacaq. Plan iki ildən çox davam edən Qəzza müharibəsini dayandırmağı hədəfləyir.

İsrail Prezident Administrasiyasının məlumatına əsasən, Prezident Şərəf Ordeni ölkəyə və ya bəşəriyyətə əhəmiyyətli töhfə vermiş şəxslərə təqdim olunur.
Qeyd edək ki, İsrail bu ordeni sonuncu dəfə 2013-cü ildə ABŞ-ın sabiq prezidenti Barak Obamaya təqdim etmişdi.