BAKI, AzerVoice, Fərid Mikayılov
Qəzzə Zolağındakı Səhiyyə Nazirliyi İsraildən daha 30 fələstinlinin cəsədinin təhvil alındığını bildirib.
AzerVoice xəbər verir ki, nazirliyin Telegram hesabında yayımlanan açıqlamada qeyd olunub ki, cəsədlər Beynəlxalq Qızıl Xaç Komitəsinin (ICRC) vasitəçiliyi ilə İsraildən Qəzzaya gətirilib.
Məlumata görə, bundan öncəki iki gün ərzində daha 90 nəfərin nəşi təhvil verilmişdi. Beləliklə, son üç gündə İsrail tərəfindən Qəzzaya ümumilikdə 120 fələstinlinin cəsədi qaytarılıb.
Səhiyyə Nazirliyi bəyan edib ki, cəsədlərin üzərində zorakılıq, işgəncə və uzun müddət bağlı saxlanılmış əl və göz izlərinə dair əlamətlər aşkar olunub. Hazırda nəşlərin şəxsiyyətinin müəyyənləşdirilməsi istiqamətində tibbi ekspertiza işləri davam etdirilir. Nazirlik yalnız 4 nəfərin kimliyinin ailələri tərəfindən təsdiqləndiyini açıqlayıb.
Xatırladaq ki, ABŞ Prezidenti Donald Tramp 9 oktyabrda Misirdə keçirilən danışıqlarda İsrail və HƏMAS arasında atəşkəs planının ilk mərhələsinin təsdiqləndiyini elan etmişdi.
10 oktyabrda Misirdə imzalanan razılaşma İsrail hökumətinin təsdiqindən sonra qüvvəyə minib. Müqaviləyə əsasən, İsrail ordusu “Sarı xətt” adlanan bölgəyə çəkilib və həmin gün saat 12:00-dan etibarən Qəzza Zolağında atəşkəs qüvvəyə minib.
