BAKI, AzerVoice, Nailə Babazadə
“QatarEnergy” şirkəti çərşənbə günü Surinam sahillərində yerləşən 9 və 10 nömrəli dəniz bloklarında hasilatın pay bölgüsü üzrə iki yeni müqavilə imzalayıb. Şirkət bu sahələrdə kəşfiyyat hüquqlarını iyun ayında keçirilən tender mərhələsində qazanmışdı.
AzerVoice xəbər verir ki, müqavilələrə əsasən, 9-cu blokda “QatarEnergy” 20% paya sahib olacaq. Blokun operatoru olan “Petronas Suriname” 30%, “Chevron” 20%, Surinamın milli neft şirkəti “Staatsolie”nin törəməsi Paradise Oil isə 30% paya malikdir.
10-cu blokda isə “QatarEnergy”nin payı 30% təşkil edir. Digər tərəflərin pay bölgüsü belədir:
Chevron (operator) – 30%, Petronas Suriname – 30%, Paradise Oil – 10%
Qətərin energetika üzrə dövlət naziri, “QatarEnergy”nin baş icraçı direktoru mühəndis Səad bin Şeridə əl-Kaabi sazişləri şərh edərək bildirib:
“Bu iki yeni müqavilənin imzalanmasından məmnunuq. Bununla Surinamda iştirakımızın olduğu dəniz bloklarının sayı 7-yə çatır və bu da ölkənin perspektivli hövzələrində daha geniş kəşfiyyat imkanları yaradır.”
O əlavə edib ki, “Chevron”, “Petronas Suriname” və “Staatsolie” ilə əməkdaşlıqdan məmnundurlar və birgə fəaliyyətin davam etdirilməsinə ümid edirlər.
9 və 10-cu dəniz blokları Surinam sahillərində, suyun dərinliyi 50 metrə çatan ərazilərdə yerləşir və son vaxtlar bölgədə aparılan uğurlu kəşfiyyatlar həmin hövzənin böyük potensiala malik olduğunu göstərib.
Qeyd edək ki, “QatarEnergy” 2024–2025-ci illər ərzində Misir, Namibiya, Əlcəzair və Konqoda yeni layihələrə qoşulmaqla beynəlxalq genişlənməsini davam etdirib və qlobal miqyasda kəşfiyyat və hasilat sahəsində əsas tərəfdaşlardan birinə çevrilməkdədir.
