BAKI, AzerVoice, Nailə Babazadə
İtaliyanın Baş naziri Giorgia Meloni Romaya səfər edən Fələstin Prezidenti Mahmud Abbasla görüş keçirib. Tərəflər iki ölkə arasında əlaqələrin inkişafını, həmçinin regional vəziyyətlə bağlı bir sıra məsələləri müzakirə ediblər.
AzerVoice xəbər verir ki, Fələstin Xəbər Agentliyi (WAFA) bildirir ki, Mahmud Abbas görüş zamanı Qəzza Zolağında atəşkəsin davamlılığının təmin olunması, humanitar yardımın əhaliyə fasiləsiz şəkildə çatdırılması, girovların və məhbusların azad edilməsi, İsrail ordusunun Zolaqdan tam çıxması və Fələstin Dövlətinin Qəzzada idarəçiliyi öz üzərinə götürməsi istiqamətində aparılan səylər barədə məlumat verib. O, həmçinin bərpa prosesinin başlanmasının və əhalinin məcburi köçürülməsi və ya torpaqların ilhaqı cəhdlərinə yol verilməməsinin zəruriliyini vurğulayıb.
Abbas İordan çayının Qərb sahilində, xüsusilə də Şərqi Qüdsdə vəziyyətin daha da gərginləşdiyini, məskunlaşma siyasətinin davam etdiyini, məskunlaşanların zorakılığı, fələstinli mülki şəxslərə hücumlar, zeytun ağaclarının sökülməsi və İslam və Xristian müqəddəs məkanlarına qarşı təcavüz hallarının artdığını diqqətə çatdırıb.
Görüşdə Fələstin tərəfi İtaliyaya Fələstin Dövlətini rəsmən tanımaq çağırışını yeniləyib. Bu addımın iki dövlətli həll yolunun qorunması, İsrail siyasəti nəticəsində prosesin sistemli şəkildə dağıdılmasının qarşısının alınması, beynəlxalq qərarlar və Ərəb Sülh Təşəbbüsü əsasında sülhə nail olunması, eləcə də 1967-ci il sərhədləri daxilində, Şərqi Qüds paytaxt olmaqla Fələstin Dövlətinin müstəqilliyinin təmin edilməsində mühüm rol oynayacağı bildirilib.
