BAKI, AzerVoice, Orxan Qədirzadə
Fələstin Dövlətinin Prezidenti Mahmud Abbas İtaliya hökumətini Fələstin Dövlətini tanımağa çağırıb.
AzerVoice xəbər verir ki, Abbas bu çağırışı Romada İtaliyanın Baş naziri Corcia Meloni ilə baş tutan görüşdən sonra “İtaliyanın Qardaşları” partiyasının təşkil etdiyi “Atreju” siyasi forumunda çıxışı zamanı səsləndirib.
İtaliya hökumət sarayı Kici-də keçirilən ikitərəfli görüşdən sonra forumda çıxış edən Abbas İtaliyanın fələstinlilərlə israillilər arasında sülh danışıqlarına verdiyi dəstəyi yüksək qiymətləndirib. O, Fələstin polisinin İtaliya təhlükəsizlik qurumları tərəfindən hazırlanması, Qəzzaya humanitar yardımın göndərilməsi və fələstinli uşaqların İtaliyada müalicə olunmasına görə Roma hakimiyyətinə təşəkkür edib.
Mahmud Abbas bildirib ki, davamlı və ədalətli sülh yalnız iki dövlətli həll yolu ilə mümkündür. Onun sözlərinə görə, Fələstin 1967-ci il sərhədləri çərçivəsində İsraillə yanaşı, qarşılıqlı hörmət əsasında mövcud ola bilər və bu, bölgədə sabitliyin təmin edilməsinin yeganə yoludur. Abbas vurğulayıb ki, Fələstin Dövlətinin olmaması Yaxın Şərqdə qeyri-sabitliyin və radikalizmin əsas səbəblərindən biridir.
Fələstin lideri qeyd edib ki, təhlükəsizlik hər bir dövlət üçün legitim hüquqdur, lakin işğalın güc yolu ilə davam etdirilməsi qanuni deyil. O, Fələstin Dövlətinin region üçün təhlükə deyil, əksinə sülhün qurulmasında tərəfdaş olacağını bildirib.
Abbas həmçinin Fələstində parlament və prezident seçkilərinin keçirilməsinə sadiq olduqlarını, hüququn əsas götürüldüyü, silahların yalnız legitim dövlət institutlarının nəzarətində olduğu bir dövlət qurmaq niyyətində olduqlarını vurğulayıb.
Forumda çıxış edən Baş nazir Corcia Meloni isə Mahmud Abbası tədbirdə salamlamaqdan məmnunluq duyduğunu bildirib. Meloni Abbasın iştirakı ilə İtaliyanın Yaxın Şərq böhranında mərkəzi və fəal rol oynadığını nümayiş etdirdiyini qeyd edib və hökumətinin Fələstin siyasətinə dair tənqidlərə cavab olaraq bunun son illərdə səsləndirilən iddiaları təkzib etdiyini deyib.
Qeyd edək ki, Mahmud Abbasın Roma səfəri çərçivəsində müxalifətdə olan sol partiyaların liderləri ilə də görüşlər keçirməsi planlaşdırılır. Xatırladaq ki, Corcia Meloni daha əvvəl İtaliyanın Fələstin Dövlətini tanıması üçün HƏMAS-ın silahı yerə qoyması və gələcək siyasi proseslərdə rol almayacağını qəbul etməsi kimi şərtlər irəli sürmüşdü.
