BAKI, AzerVoice, Orxan Qədirzadə

Suriyanın Humus vilayətinin Tədmur (Palmira) rayonu ərazisində ABŞ və Suriya qüvvələrinin birgə patrulu zamanı silahlı hücum baş verib. Hadisə nəticəsində ABŞ hərbçiləri arasında yaralananlar olduğu bildirilir.

AzerVoice xəbər verir ki, Suriya dövlət xəbər agentliyi SANA-nın məlumatına görə, asayiş məqsədilə həyata keçirilən patrul fəaliyyətinə edilən hücumda Suriya təhlükəsizlik qüvvələrindən iki nəfər, eləcə də ABŞ qüvvələrindən bir neçə hərbçi yaralanıb. Hücumu həyata keçirdiyi bildirilən silahlı şəxs zərərsizləşdirilib.

Məlumata əsasən, hadisədən sonra Deyr əz-Zor–Şam beynəlxalq avtomobil yolu müvəqqəti olaraq nəqliyyatın hərəkəti üçün bağlanıb. Yaralı ABŞ hərbçilərinin Suriyanın cənubundakı Tənəf bölgəsində yerləşən ABŞ hərbi bazası vasitəsilə təxliyə edildiyi qeyd olunur.

Hücumdan sonra bölgədə təhlükəsizlik tədbirləri gücləndirilib. Koalisiya qüvvələrinə məxsus hərbi helikopter və döyüş təyyarələrinin Tədmur səmasında intensiv uçuşlar həyata keçirdiyi bildirilib.

Mənbələr hücumun İŞİD terror təşkilatının üzvləri tərəfindən törədildiyini iddia edir. Hadisə ilə bağlı ABŞ tərəfi hələlik rəsmi açıqlama verməyib.