BAKI, AzerVoice, Nailə Babazadə
İsrailin xarici işlər naziri Katz nə Qəzza zolağından, nə də Suriyadan geri çəkiləcəklərini bildirib.
AzerVoice xəbər verir ki, Yaxın Şərqdəki demək olar ki, bütün gərginliklərin tərəfi olan İsrail bölgədəki zorakı siyasətindən imtina etməyəcəyinə dair siqnallar verir. Xarici işlər naziri İsrael Katz işğal altındakı İordan çayının qərb sahilində 1200 yeni yaşayış məntəqəsinin inşasını nəzərdə tutan razılaşmanın imzalanma mərasimində çıxış edərək, Qəzza və Suriyadan çəkilməyəcəklərini deyib.
Beyt-El yəhudi yaşayış məntəqəsində danışan Katz Qəzza zolağının şimalında yaşayış məntəqələrinin yenidən qurulacağını bildirib. İsrail əsgərləri tərəfindən yaradılan hərbi–kənd təsərrüfatı yaşayış məntəqələrinə istinad edərək deyib: “Vaxtı çatanda, Tanrının izni ilə, Qəzzanın şimalında kökündən sökülüb atılmış icmaların yerinə Nahal ön karakollarını quracağıq. Bunu düzgün şəkildə və uyğun zamanda edəcəyik.”
Lakin saatlar sonra Katzın ofisi düzəliş edərək “hökumətin Qəzza zolağında yaşayış məntəqələri qurmaq niyyətinin olmadığını” açıqlayıb. Katzın Qəzzanın şimalına öncü qrupların göndərilməsi ilə bağlı açıqlamalarının “yalnız təhlükəsizlik kontekstində edildiyi” vurğulanıb.
HƏMAS ilə İsrail arasında əldə olunan atəşkəs razılaşmasına əsasən, ikinci mərhələdən sonra İsrail ordusunun Qəzzadakı bütün bölgələri tərk etməsi tələb olunur. Qəzza planının birinci mərhələsində işğal etdiyi ərazilərdən qismən çəkilən İsrail ordusu, ikinci mərhələdən öncə Qəzza zolağının yarısını hələ də işğal altında saxlayır. Katsın bəhs etdiyi İsrail ordusuna bağlı Nahal proqramları hərbi xidməti mülki icma həyatı ilə birləşdirməyi hədəfləyir. Digər tərəfdən, “Peace Now” (İndi Sülh) adlı vətəndaş cəmiyyəti təşkilatı Katzın Qəzzada yaşayış məntəqələrinin qurulmasına verdiyi dəstəyə görə sərt bəyanat yayıb. Təşkilat bu cür bəyanatların reallıqdan uzaq olduğunu və ifrat sağçı dairələrlə üst-üstə düşdüyünü bildirib.
İsrailli nazir Qəzza zolağı ilə yanaşı, “bir millimetr belə geri addım atmayacağıq” ifadəsini işlədərək Suriyadan da çıxmayacaqlarını iddia edib. İsrail ordusu Suriyada Əsəd rejiminin devrilməsindən sonra keçən bir il ərzində 12 min dönüm ərazini işğal etmiş, strateji əhəmiyyət daşıdığı deyilən Şeyx dağı da daxil olmaqla doqquz hərbi baza qurmuşdu.
