BAKI, AzerVoice, Nailə Babazadə
Səudiyyə Ərəbistanı Suriya hökuməti ilə Suriya Demokratik Qüvvələri (SDQ) arasında əldə olunmuş tarixi razılaşmanı dəstəklədiyini bəyan edib.
AzerVoice xəbər verir ki, Krallığın Xarici İşlər Nazirliyi bazar ertəsi yaydığı bəyanatda Dəməşq ilə SDQ arasında əldə olunan 14 bəndlik sazişi müsbət addım kimi qiymətləndirib. Razılaşmaya əsasən, bütün SDQ qüvvələri Suriyanın Müdafiə və Daxili İşlər nazirliklərinin tərkibinə daxil ediləcək. Həmçinin kürd birləşmələrinin Fərat çayının şərqinə çəkilməsi və Deyr əz-Zor ilə Rəqqa vilayətlərinin idarəetməsinin dərhal mərkəzi hökumətə təhvil verilməsi nəzərdə tutulur. Sənədə görə, Suriya dövləti bölgədəki bütün sərhəd keçid məntəqələri, neft və qaz yataqları üzərində nəzarəti tam bərpa edəcək.
Səudiyyə Ərəbistanı rəsmi Dəməşq ilə SDQ arasında atəşkəsin əldə olunmasında vasitəçilik etdiyi üçün ABŞ-a təşəkkürünü bildirib. Razılaşma Hələb ətrafında tərəflər arasında baş verən şiddətli toqquşmalardan sonra imzalanıb. Hazırda SDQ qüvvələri Hələb bölgəsindən geri çəkilib və şəhərin şərqindəki əksər ərazilər Suriya ordusunun nəzarətinə keçib. Suriya hökuməti eyni zamanda kürd azlığının hüquqlarını gücləndirən yeni fərmanlar imzalayaraq kürd dilini rəsmi dillərdən biri kimi tanıyıb.
