BAKI, AzerVoice, Nailə Babazadə
İsrail ordusu Livan hökumətinin Hizbullahın tərksilah edilməsi prosesində irəliləyiş olduğunu elan etməsinə baxmayaraq bazar ertəsi ölkənin cənubuna silsilə hava zərbələri endirib.
AzerVoice xəbər verir ki, İsrail hərbçiləri bir müddət əvvəl Livanın cənubundakı bir neçə bölgədə Hizbullah tərəfindən terrorçuların təlimi üçün istifadə edilən infrastrukturun hədəf alındığını bildirib. Rəsmi bəyanatda bu nöqtələrin İsrail qüvvələrinə və mülki şəxslərə hücum hazırlamaq məqsədilə istifadə edildiyi qeyd olunub. Livanın Milli İnformasiya Agentliyi isə İsrailin ən azı beş kəndi — Ansar, Zərariyə, Kfar Melki, Nahr əl-Şita və Buslayan itop və hava atəşinə tutduğunu xəbər verib.
Keçən həftə Livan ordusu ölkə boyu tərksilah planının ilk mərhələsi kimi Litani çayından cənubda Hizbullahın silahlarını tamamilə təhvil verdiyini açıqlamışdı. Lakin İsrail tərəfi bu səyləri kifayət qədər ciddi hesab etmədiyini bildirib. Maraqlıdır ki, bu gün hədəf alınan beş kənd Litani çayından şimalda yerləşir və tərksilah planının ilk mərhələsinə daxil olmayıb. Livan Səhiyyə Nazirliyi cümə günü baş verən digər İsrail zərbəsi nəticəsində cənubda bir nəfərin həlak olduğunu təsdiqləyib.
