BAKI, AzerVoice, Nailə Babazadə
Livan Silahlı Qüvvələrinin komandanı general Rodolf Haykal fevralın əvvəlində Vaşinqtona rəsmi səfər edəcək.
AzerVoice xəbər verir ki, ötən ilin noyabrında ABŞ tərəfindən təxirə salınan bu səfər Livan ordusunun silahlanması və regional təhlükəsizlik məsələləri baxımından mühüm əhəmiyyət kəsb edir. Fevralın 3-dən 5-dək davam edəcək görüşlərin gündəliyinə Livan ordusunun ehtiyacları, iki ölkə arasındakı hərbi əməkdaşlığın genişləndirilməsi və Vaşinqtonun Beyruta davamlı hərbi dəstəyi daxil edilib.
Səfər çərçivəsində müzakirə olunacaq əsas mövzulardan biri Livan ordusunun ölkə ərazisindəki qeyri-qanuni silahların müsadirə edilməsi və dövlət suverenliyinin bütün bölgələrdə bərpa olunması planıdır. General Haykal 2025-ci ilin sonuna qədər ölkənin cənubunda, İsrail sərhədinə yaxın ərazilərin qeyri-dövlət silahlı qruplaşmalarından təmizlənməsinin birinci mərhələsi haqqında amerikalı rəsmilərə geniş məlumat verəcək.
Buna baxmayaraq, Livan tərəfi planın tam icrası yolunda bir sıra çətinliklərin olduğunu vurğulayır. Davam edən İsrail hücumları, bəzi Livan ərazilərinin işğal altında saxlanılması və 27 noyabr 2024-cü il tarixli atəşkəs razılaşmasının mütəmadi pozulması halları ordunun fəaliyyətinə mane olan əsas amillər kimi göstərilir. Livan hərbi rəhbərliyi həmçinin BMT-nin müvəqqəti sülhməramlı qüvvələri (UNIFIL) ilə koordinasiyalı fəaliyyəti davam etdirməkdə qərarlı olduğunu bildirib.
Eyni zamanda, bu səfər martın 5-də Parisdə keçiriləcək beynəlxalq donor konfransına hazırlıq məqsədi daşıyır. Livan Prezidenti Jozef Aun hərbi və təhlükəsizlik qurumlarına tapşırıq verərək, beynəlxalq tərəfdaşlardan zəruri yardımların alınması üçün ordunun texniki və maddi ehtiyacları barədə dəqiq hesabatların hazırlanmasını tələb edib.
