BAKI, AzerVoice, Nailə Babazadə
Qəzza zolağında həyata keçirilən hücumlarla bağlı sərt tənqidlər fonunda İsrailin, Türkiyə Prezidenti Rəcəb Tayyib Ərdoğanın oğlu Bilal Ərdoğan da daxil olmaqla 29 Türkiyə vətəndaşının ölkəyə girişini qadağan etməyə hazırlaşdığı iddia edilir.
AzerVoice xəbər verir ki, Israel Hayom qəzetinin məlumatına görə, İsrailin Diaspora Nazirliyi aralarında siyasətçilər, jurnalistlər, akademiklər və ictimai xadimlərin olduğu 29 Türkiyə vətəndaşının İsrailə girişinin əngəllənməsi ilə bağlı tövsiyə xarakterli qərar qəbul edib.
Məlumata əsasən, qadağa qərarının əhatə etdiyi şəxslər arasında Prezident Ərdoğanın oğlu Bilal Ərdoğan, Dini İşlər üzrə keçmiş sədr Əli Erbaş, İnsan Haqları və Azadlıqları (İHH) İnsani Yardım Fondunun sədri Bülənt Yıldırım da yer alır.
İsrail tərəfi qərarı İsrailə qarşı “boykot çağırışları” və “antisemitizm” iddiaları ilə əsaslandırır. Bildirilir ki, qəbul edilən tövsiyə qərarı giriş qadağalarının icrası səlahiyyətinə malik olan Əhali və Miqrasiya İdarəsinə təqdim edilib.
İsrailin Diaspora naziri Amiçay Çikli açıqlamasında Türkiyəni “düşmən dövlət” kimi xarakterizə edərək, İsrailə qarşı düşmən fəaliyyətlərdə iştirak edənlərə qarşı zəruri addımların atılmağa davam ediləcəyini iddia edib.
İsrailin 2023-cü ilin oktyabr ayında Qəzza zolağına başladığı hücumlar nəticəsində 71 min 455 fələstinli həyatını itirib, 171 min 347 nəfər isə yaralanıb.
Məlumata görə, 10 oktyabr tarixində qüvvəyə minən atəşkəs razılaşmasına baxmayaraq, İsrail ordusu Qəzza zolağını hədəf almağı davam etdirir.
