BAKI, AzerVoice, Orxan Qədirzadə
ABŞ Prezidentinin Yaxın Şərq üzrə xüsusi nümayəndəsi Stiv Uitkoff və ABŞ liderinin müşaviri Cared Kuşner Qəzza zolağının gələcəyi və regional prosesləri müzakirə etmək məqsədilə İsraildə səfərdədir.
AzerVoice xəbər verir ki, mənbələrin bildirdiyinə görə, Stiv Uitkoff və Cared Kuşner İsrailin Baş naziri Benyamin Netanyahu ilə görüşmək üçün bu gün ölkəyə gəliblər. Görüşün əsas gündəmini Qəzza zolağında mövcud vəziyyət, müharibədən sonrakı mərhələ və ABŞ tərəfindən irəli sürülən yeni təşəbbüslər təşkil edir. Netanyahu ofisinin sözçüsü görüşün keçiriləcəyini təsdiqləsə də, danışıqların detalları açıqlanmayıb.
Qeyd olunur ki, ABŞ administrasiyası ötən gün Qəzza zolağında “sıfırdan qurulacaq yeni Qəzza” planını elan edib. Sözügedən plan yaşayış evlərinin tikintisini, məlumat mərkəzlərinin yaradılmasını və sahilyanı istirahət zonalarının salınmasını nəzərdə tutur. Bu təşəbbüs ABŞ Prezidenti Donald Trampın İsrail ilə HƏMAS arasında əldə olunmuş, lakin tez-tez pozulan atəşkəsin davamlı hala gətirilməsi istiqamətində səylərinin tərkib hissəsi kimi qiymətləndirilir.
Bu arada Qəzza zolağında zorakılıq halları davam edir. Qəzza Səhiyyə Nazirliyinin açıqlamasına görə, bu gün baş verən iki ayrı hadisə zamanı, İsrail atəşi nəticəsində ikisi uşaq olmaqla üç nəfər həyatını itirib. Nazirliyin məlumatına əsasən, müharibə başlayandan bəri Qəzzada ölənlərin sayı 71 min 654 nəfərə çatıb.
İsrailin hərbi əməliyyatları nəticəsində Qəzza zolağının böyük hissəsi dağıdılıb. ABŞ-nin dəstəklədiyi Qəzza İdarəetmə Komitəsinin rəhbəri Əli Şaas Rəfah sərhəd-keçid məntəqəsinin bu həftə açılacağını bildirib. Bu keçid iki milyondan çox əhalisi olan Qəzza üçün faktiki olaraq yeganə giriş-çıxış nöqtəsi hesab olunur.
Mənbələr İsrailin Misir üzərindən Rəfah keçid məntəqəsi ilə Qəzzaya qayıdan fələstinlilərin sayını məhdudlaşdırmaq niyyətində olduğunu, bölgədən çıxanların sayının daxil olanlardan çox olmasının planlaşdırıldığını qeyd edir. Rəfah keçidinin açılması ABŞ-nin müharibənin dayandırılmasına dair planının ilkin mərhələlərindən biri kimi nəzərdə tutulurdu. ABŞ bu ay planın ikinci mərhələsinə keçildiyini elan edib. Həmin mərhələdə İsrail qoşunlarının Qəzzadan çıxarılması və HƏMAS-ın bölgənin idarəçiliyindən geri çəkilməsi gözlənilir
