BAKI,VOA

Qətər Xarici İşlər Nazirliyinin rəsmi nümayəndəsi Məcid əl-Ənsari ölkəsinin regionda davam edən müharibə ilə bağlı rəsmi mövqeyini açıqlayıb. O, Qətərin hər zaman münaqişələrin dialoq yolu ilə həllinin tərəfdarı olduğunu, lakin hazırda diqqəti yalnız öz suverenliyinin qorunmasına yönəltdiyini bildirib.

VOA xəbər verir ki, Məcid əl-Ənsarinin bəyanatında Qətərin diplomatik xətti və regional təhlükəsizliklə bağlı aşağıdakı mühüm məqamlar vurğulanıb.
"Bizim mövqeyimiz aydındır: müharibə diplomatik yollarla bitirilməlidir. Tərəflər danışıqlar masasına nə qədər tez otursa, bir o qədər yaxşıdır," – deyən sözçü, Qətərin həmişə sülh həllərini dəstəklədiyini qeyd edib. Lakin o, maraqlı bir faktı da diqqətə çatdırıb.
"Hazırda iki tərəf arasında vasitəçiliklə bağlı hər hansı birbaşa Qətər səyi yoxdur. Biz hazırda yalnız öz ölkəmizi və suverenliyimizi müdafiə etməyə fokuslanmışıq."-deyə o bildirib.
Qətər rəsmisi həm ölkə daxilində, həm də regionda enerji obyektlərinin hədəf alınmasını qətiyyətlə rədd etdiklərini bildirib
"Mülki əhaliyə xidmət edən həyati vacib enerji qurğuları hər növ təhdiddən qorunmalıdır. Biz bu obyektlərə qarşı istənilən təcavüzü pisləyirik."-deyə o əlavə edib.
Məcid əl-Ənsari Qətərin təcavüzə məruz qaldığını xatırladaraq, bunun qonşuluq və qardaşlıq prinsipləri ilə bir araya sığmadığını vurğulayıb.
"Ölkəmiz hücuma məruz qalıb və bu, qonşuluq münasibətlərinə tamamilə ziddir. Qardaşlıq və qonşuluq əlaqələri bizə qarşı təcavüzü və təhdidi istisna etməlidir."-deyə Qətər XİN rəsmisi əlavə edib.