BAKI,VOA, Fərid Mikayılov
İraq neftinin Suriya üzərindən daşınması ilə bağlı yeni logistika marşrutu işə düşüb.
VOA xəbər verir ki, İraqdan yola çıxan 176 neft tankeri Tenef sərhəd-keçid məntəqəsindən Suriyaya daxil olaraq Banyas neft terminalına istiqamətlənib.
Məlumata görə, tanker karvanı Suriya sahilində yerləşən Banyas terminalına çatdıqdan sonra yük boşaldılacaq və neft dəniz yolu ilə beynəlxalq bazarlara göndərilmək üçün tanker gəmilərə yüklənəcək.
Suriya Neft Şirkətinin nümayəndəsi Safvan Şeyx Əhməd bildirib ki, bu, ilk mərhələdə həyata keçirilən 176 tankerdən ibarət daşınmadır və prosesin davam etdirilməsi planlaşdırılır.
Onun sözlərinə görə, bu marşrutun işə salınması Suriyanın enerji tranzit mərkəzi kimi rolunu gücləndirəcək və dövlət gəlirlərinin artmasına töhfə verəcək.
