BAKI,VOA, Nailə Babazadə
Birləşmiş Millətlər Təşkilatının Uşaq Fondu (UNICEF), İsrailin 8 aprel hücumları nəticəsində Livanda 33 uşağın həlak olduğunu və 153-nün yaralandığını bildirdi.
VOA xəbər verir ki, UNICEF-in rəsmi internet saytı və sosial media hesabı vasitəsilə edilən açıqlamalarda mövzu ilə bağlı ətraflı məlumat verilib.
Açıqlamada Livandakı hücumlardan uşaqların ciddi şəkildə təsirləndiyi vurğulanaraq, "Uşaqlar dağıntılar altından çıxarılır. Ailələr parçalanır," ifadələri işlədilib.
Livanda 2 mart tarixindən bu yana "600-dən çox uşağın öldürüldüyü və ya yaralandığı" qeyd edilərək, insan haqlarına hörmət edilməsi və uşaqların qorunması çağırışı edilib.
Açıqlamada həmçinin bildirilib: "Livan daxilində aralarında təxminən 390 min uşağın da olduğu bir milyondan çox insan didərgin düşüb; bir çoxu ikinci, üçüncü, hətta dördüncü dəfə köç etmək məcburiyyətində qalıb."
ABŞ və İran arasında əldə olunan və İsraili də əhatə edən müvəqqəti atəşkəsin Livanı əhatə edib-etmədiyi barədə ziddiyyətli iddialar ortaya atıldığı bir vaxtda, İsrail ordusu 8 aprel çərşənbə günü paytaxt Beyrut ilə Livanın şərq və cənub hissələrinə əvvəlcədən xəbərdarlıq etmədən eyni vaxtda təxminən 100 hava zərbəsi endirmişdi.
Livan Mülki Müdafiə İdarəsi hücumlarda ən azı 254 nəfərin həyatını itirdiyini açıqlamışdı.
Sözügedən hücumlar İsrailin 2 martdan bəri Livana təşkil etdiyi ən şiddətli hücumlar kimi qeydə alınıb.
