BAKI,VOA, Nailə Babazadə

İsrail ordusunun martın 2-dən bu yana Livana qarşı davam etdirdiyi hücumlarda həyatını itirənlərin sayı son 24 saat ərzində 43 nəfər artaraq 2 min 167-yə yüksəlib.

VOA xəbər verir ki, Livan Səhiyyə Nazirliyinin rəsmi məlumatına əsasən, hücumlar nəticəsində yaralananların ümumi sayı isə 7 min 61 nəfərə çatıb. Həlak olanlar arasında 172 uşaq və 260 qadın var.

Müharibənin səhiyyə sisteminə vurduğu zərər də ağırlaşmağa davam edir. Belə ki, İsrailin hücumları nəticəsində 91 tibb işçisi həyatını itirib, yaralanan tibb personalının sayı isə 214 nəfərə çatıb. Bombardmanlar nəticəsində 6 xəstəxana fəaliyyətini dayandırıb, 108 təcili tibbi yardım maşını isə tamamilə sıradan çıxıb. Livan hökuməti ölkə daxilində didərgin düşən insanların sayının 1 milyon 162 min nəfəri keçdiyini, İsrail ordusunun isə Beyrut daxil olmaqla hava, dəniz və quru əməliyyatlarını genişləndirdiyini bildirib.