BAKI,VOA, Nailə Babazadə
Fransa Prezidenti Emmanuel Makron bu gün Parisdə Livanın Baş naziri Nəvaf Salam ilə görüşəcək.
VOA xəbər verir ki, Yelisey sarayından verilən məlumata görə Fransa lideri görüş zamanı Livandakı atəşkəs rejiminə tam sadiqliyini və ölkənin ərazi bütövlüyünə dəstəyini bir daha təsdiqləyəcək.
Pakistan isə ABŞ və İran arasında atəşkəs müddətinin çərşənbə günü başa çatması ərəfəsində yeni danışıqlar raunduna ev sahibliyi etməyə hazırlaşır.
Makron və Salam tərəfindən keçiriləcək müzakirələrdə məcburi köçkünlərə humanitar dəstək həmçinin Livanın suverenliyinin gücləndirilməsi və bərpası üçün zəruri olan iqtisadi islahatlar əsas mövzular olacaq. Bu görüş ötən şənbə günü Livanın cənubunda BMT-nin sülhməramlı qüvvələrinə (UNIFIL) edilən və bir fransız sülhməramlısının ölümü üç nəfərin yaralanması ilə nəticələnən hücumdan sonraya təsadüf edir. Makron Livan hakimiyyətini hadisəni tam araşdırmağa və günahkarları dərhal məsuliyyətə cəlb etməyə çağırıb.
Regional gərginlik fonunda Livan Prezidenti Cozef Aun onilliklər sonra ilk dəfə İsrail ilə birbaşa danışıqlar təklif edib. Bu təklif əvvəlcə rədd edilsə də ABŞ və İran arasında Pakistanın vasitəçiliyi ilə əldə olunan razılaşmadan sonra vəziyyət dəyişib. Ötən həftə Vaşinqtonda Livan və İsrail arasında onilliklər sonra ilk birbaşa diplomatik təmas baş tutub və bu həftənin sonunda tərəflərin yenidən görüşəcəyi gözlənilir.
Hizbullah qruplaşması isə Livanın İsrail ilə birbaşa danışıqlar aparmasına qarşı çıxaraq əldə olunan atəşkəsin danışıqların deyil məhz İranın təzyiqlərinin nəticəsi olduğunu iddia edir. Eyni zamanda İran tərəfi atəşkəs sazişinin Livana da şamil edilməli olduğunu vurğulayaraq əks halda Hörmüz boğazını açmayacağını bildirir. Bu mürəkkəb diplomatik vəziyyətdə Paris görüşünün regiondakı sabitliyə verəcəyi töhfə beynəlxalq birliyin diqqət mərkəzindədir.
