BAKI,VOA Nailə Babazadə
Qətər Turizm İdarəsinin marketinq qolu olan “Visit Qatar”, 2026-cı ilin yay mövsümü üçün nəzərdə tutulan genişmiqyaslı “Hala Summer” kampaniyasına start verib.
VOA xəbər verir ki, bu layihə həm yerli sakinlər, həm də beynəlxalq turistlər üçün Qətəri yay aylarında cəlbedici bir istirahət mərkəzinə çevirmək məqsədi daşıyır.
Kampaniya çərçivəsində ölkə boyu müxtəlif əyləncə tədbirləri, ailəvi festivallar, lüks hotellərdə xüsusi endirimlər və ticarət mərkəzlərində genişmiqyaslı aksiyalar təşkil olunacaq. Proqramın əsas hədəfi Qətərin zəngin mədəni irsini müasir əyləncə imkanları ilə birləşdirərək ziyarətçilərə fərqli bir yay təcrübəsi yaşatmaqdır. Builki layihədə su parkları, qapalı əyləncə mərkəzləri və dənizkənarı istirahət zonaları xüsusi yer tutur.
“Visit Qatar” həmçinin regional turistləri, xüsusilə Körfəz Əməkdaşlıq Şurası (KƏŞ) ölkələrindən olan qonaqları cəlb etmək üçün özəl paketlər hazırlayıb. Bu strateji addım Qətərin təkcə qışda deyil, ilboyu turizm mərkəzi kimi mövqeyini möhkəmləndirmək və ölkə iqtisadiyyatının şaxələndirilməsinə töhfə vermək niyyəti daşıyır.
