BAKI,VOA,Yusif Şərifzadə

İranın xarici işlər naziri Seyid Abbas Əraqçi ABŞ-ın son hərbi əməliyyatlarını sərt tənqid edib. O bildirib ki, Vaşinqton diplomatik həll imkanları ortaya çıxdığı zaman hərbi addımlara üstünlük verir.

VOA xəbər verir ki, Abbas Əraqçi “X” sosial şəbəkəsində paylaşdığı açıqlamada iranlıların heç vaxt təzyiq qarşısında geri çəkilmədiyini vurğulayıb. O, ABŞ-ın son addımlarının kobud təzyiq vasitəsi və ya Vaşinqtonu yeni qarşıdurmaya sürükləmək istəyən qüvvələrin planı ola biləcəyini qeyd edib.

İranlı nazir bildirib ki, ölkəsinin raket ehtiyatları və buraxılış imkanları müharibədən əvvəlki səviyyənin təxminən 120 faizi həcmində qiymətləndirilir. Əraqçi paylaşımında ABŞ mediasında yayımlanan materiala istinad edərək, Mərkəzi Kəşfiyyat İdarəsinin İranın ABŞ-İsrail bombardmanlarından sonra silah arsenalının böyük hissəsini qoruyub saxladığı qənaətinə gəldiyini qeyd edib.

Məlumata görə, son gərginlik Vaşinqtonun müharibənin dayandırılması ilə bağlı danışıqlar çərçivəsində Tehranın cavabını gözlədiyi dövrə təsadüf edir. ABŞ dövlət katibi Marko Rubio İran tərəfinin cavabının gün ərzində təqdim olunmasının gözlənildiyini bildirib.