BAKI,VOA,Yusif Şərifzadə
İsrail ordusu Qəzzanın mərkəzində bazar günü həyata keçirilən hücumda HƏMAS-ın silah istehsalı ilə məşğul olan əsas üzvlərindən birini öldürdüyünü iddia edib.
VOA xəbər verir ki, ordu həmin şəxsi Məhəmməd Əbu Məlulh kimi tanıyıb və onun İsrail hərbçilərinə qarşı istifadə edilən silahların istehsalında mühüm rol oynadığını bildirib. Məlumata görə, Nuseyrat qaçqın düşərgəsində yerləşən bir mənzilə endirilən hava zərbəsindən sonra Deir əl-Balahdakı Əl-Əqsa Şəhidlər Xəstəxanasına bir ailədən üç nəfərin meyiti gətirilib, onların arasında 6 aylıq körpə də olub. Ölənlər Məhəmməd Əbu Məlulh, həyat yoldaşı Alaa Zəqlan və övladı Osama olub. Tibb işçiləri hücum nəticəsində təxminən 10 nəfərin də yaralandığını bildiriblər.
Hesabatda vurğulanır ki, oktyabrda elan edilən “atəşkəs”dən sonra da İsrail Qəzza zolağı boyunca demək olar ki, gündəlik hücumlarını davam etdirir. Qəzza Səhiyyə orqanlarının məlumatına görə, bu dövrdə təxminən 900 nəfər həlak olub.
