BAKI,VOA Orxan Qədirzadə

Suriya Xarici İşlər Nazirliyi nazirliyin məlumat sistemlərinə qarşı həyata keçirilən kiberhücum nəticəsində həssas məlumatların internetdə yayılması ilə bağlı araşdırmaya başladığını açıqlayıb.

Nazirliyin yaydığı bəyanatda bildirilib ki, hadisənin mənbəyini, həyata keçirilmə üsulunu və sızmanın miqyasını müəyyən etmək məqsədilə geniş araşdırma aparılır. Qurum qeyd edib ki, araşdırmanın nəticələrinə uyğun olaraq hadisənin nəticələrinin aradan qaldırılması və məsul şəxslərin müəyyən edilərək qanuni tədbirlərin görülməsi istiqamətində addımlar atılacaq.

Məlumata görə, internetdə yayılan sənədlər arasında diplomatik nümayəndəliklər arasında aparılmış rəsmi yazışmalar, Suriyaya gələn vətəndaşlarla bağlı məlumatlar, eləcə də bəzi əməkdaşların əməkhaqqı məlumatları yer alıb.

Sızdırılmış sənədlər bu məqsədlə yaradılmış kanal vasitəsilə yayımlanıb. Yayılan materialların əksəriyyətinin 2024-cü ilin dekabr ayında Bəşşar Əsəd hakimiyyətinin süqutundan sonrakı dövrə aid olduğu bildirilir.

Xarici İşlər Nazirliyi vurğulayıb ki, baş verən hadisəyə baxmayaraq, diplomatik və konsulluq xidmətləri, eləcə də nazirliyin digər fəaliyyət istiqamətləri normal qaydada davam etdirilir.

Qurum eyni zamanda informasiya təhlükəsizliyinin gücləndirilməsi, rəsmi sənədlərin qorunması və dövlət maraqlarının müdafiəsi üçün bütün zəruri tədbirlərin görüləcəyini bəyan edib.

Nazirlik ictimaiyyəti məlumat əldə edərkən yalnız rəsmi mənbələrə istinad etməyə çağırıb. Bəyanatda qeyd olunub ki, dövriyyədə olan bəzi sənədlər və materiallar rəqəmsal müdaxiləyə məruz qalmış, dəyişdirilmiş və ya təhrif edilmiş ola bilər. Bu isə ictimai rəyin yanlış istiqamətləndirilməsinə və hadisələrin reallığa uyğun olmayan şəkildə təqdim edilməsinə səbəb ola bilər.

Hazırda hadisənin bütün təfərrüatlarının müəyyənləşdirilməsi istiqamətində araşdırmalar davam edir.