BAKI,VOA,Yusif Şərifzadə

İsrail qüvvələrinin işğal altındakı İordan çayının qərb sahilində keçirdiyi əməliyyatlar və reydlər davam edir.

VOA xəbər verir ki, Fələstinin WAFA xəbər agentliyinin məlumatına görə, gecə saatlarında Ramallahın şimal-qərbində yerləşən Deyr Əbu Mişəl qəsəbəsində və Nablus şəhərində keçirilən əməliyyatlar zamanı beş fələstinli saxlanılıb.

Məlumata əsasən, Deyr Əbu Mişəldə Fuad Əbu Səmra, Səmhan Mustafa, Abdullah ət-Təhiyyə və Həsən Qərib saxlanılıb. Nablusda isə Cəbəl Fətayir məhəlləsində bir neçə evə basqın edildikdən sonra Ziya Məhəmməd Fətayir saxlanılıb.

İsrail qüvvələrinin Ramallahın şimal-şərqində yerləşən əl-Muğəyyir qəsəbəsinin son açıq giriş yolunu da bağladığı bildirilir.

Bundan başqa, Beyt Furik düzənliyində fermerlərin buğda biçiminə mane olunduğu qeyd edilir. Məlumata görə, əraziyə çoxlu sayda hərbçi və məskunlaşma məntəqələrinin sakinləri yerləşdirilib.

Fələstin Xarici İşlər Nazirliyi isə Şərqi Qüdsün Silvan məhəlləsində Yunan Pravoslav Patriarxlığına məxsus torpaqların nəzarətə götürülməsini pisləyib. Nazirlik bunu ciddi pozuntu kimi qiymətləndirib. Bildirilir ki, ərazidən patriarxlığın nümayəndəsi çıxarılıb, avadanlıqlar müsadirə olunub, ağaclar kökündən çıxarılıb və torpaq sahəsi hasara alınıb.