BAKI,VOA,Yusif Şərifzadə
İsrail qüvvələrinin Qəzza şəhəri yaxınlığında bir qrup fələstinliyə zərbə endirdiyi və nəticədə bir neçə nəfərin ağır yaralandığı bildirilib. Hadisə Qəzza zolağında davam edən gərginlik fonunda baş verib.
VOA xəbər verir ki, Fələstinin Vəfa xəbər agentliyinin tibbi mənbələrə istinadən yaydığı məlumata görə, hücum Qəzza şəhərinin şimal-qərbində yerləşən Əl-Təvam bölgəsində baş verib.
Məlumata əsasən, İsrail qüvvələrinin açdığı atəş nəticəsində bir neçə fələstinli ağır yaralanıb. Həmçinin Qəzza zolağının mərkəzi hissəsində bir şəxsin İsrail qüvvələri tərəfindən güllələnərək ağır yaralandığı bildirilib.
Fələstin Səhiyyə Nazirliyinin məlumatına görə, 2023-cü ilin oktyabrından İsrailin Qəzza zolağında başlatdığı hərbi əməliyyatlar nəticəsində ölənlərin sayı ən azı 73 min 231 nəfərə çatıb. Yaralananların sayının isə 173 min 686 nəfər olduğu açıqlanıb.
Qəzza zolağında humanitar vəziyyət ağır olaraq qalır. Beynəlxalq təşkilatlar bölgədə mülki əhalinin təhlükəsizliyinin təmin edilməsi və humanitar yardımların çatdırılması ilə bağlı çağırışlar edir.
