Yəmənin cənub-qərbində hökumət qüvvələri ilə İranın dəstəklədiyi husilər arasında günlərdir davam edən döyüşlər nəticəsində ölənlərin sayı 300-ü keçib. Toqquşmalar fonunda yüzlərlə ailə evlərini tərk edib.
ArabAZ xəbər verir ki,Yəmən hökumətinin iki hərbi rəsmisinin məlumatına görə, şənbə günündən bazar gününün ilk saatlarınadək 84 hökumət hərbçisi, husi mənbələrinin məlumatına əsasən isə 57 üsyançı öldürülüb. Tərəflər Qırmızı dənizə çıxış üçün strateji əhəmiyyət daşıyan əraziyə nəzarət uğrunda mübarizə aparır.
Husilər cümə axşamı hökumətin nəzarətində olan Moxa liman şəhərinin təcrid olunması və Bab əl-Məndəb boğazına yaxın ərazilərə irəliləmək məqsədilə hücuma başlayıb. Yəmən hökumətinin hərbi rəsmilərindən biri husilərin şənbə axşamı Taizlə Moxa arasındakı yolu kəsdiyini bildirib.
Taiz əyalətinin Məqbənə və Cəbəl Həbəşi rayonlarında döyüşlərdən qaçan ailələr daxili köçkünlər üçün düşərgələrə sığınıb. BMT-nin Humanitar Məsələlərin Koordinasiyası Ofisinin məlumatına görə, intensiv atəşə tutulma və toqquşmalar nəticəsində təxminən 1 790 ailə didərgin düşüb.
BMT Baş katibinin sözçüsü Antonio Quterreşin davam edən döyüşlərdən ciddi narahatlıq keçirdiyini bildirib. O, qarşıdurmanın Yəmən və xalqı üçün siyasi, iqtisadi və təhlükəsizlik baxımından ağır nəticələr doğura biləcəyi barədə xəbərdarlıq edib.
Hökumət qüvvələrinin Ədən şəhərində yerləşən nümayəndəsi bazar günü səhər döyüşlərin səngidiyini bildirib. Onun sözlərinə görə, hökumət qüvvələri Hays rayonunun şimalında mövqelərini möhkəmləndirib, husilər isə Taizin qərbində, Haysın cənubunda Bab əl-Məndəb istiqamətində irəliləyib.
Ekspertlər husilərin Moxa ətrafındakı zəif müdafiə xəttindən istifadə edərək Taizlə Bab əl-Məndəb və Moxa arasındakı əlaqələri kəsməyə çalışdığını bildirirlər. Qarşıdurmanın 2022-ci ildə əldə edilmiş atəşkəsin iyul ayında dağılmasından sonra ölkədə ən ağır gərginlik olduğu qeyd edilir.
İranın Hörmüz boğazını kommersiya gəmilərinin hərəkəti üçün bağlamasından sonra Bab əl-Məndəb boğazının Asiya ilə Avropanı Süveyş kanalı vasitəsilə birləşdirən marşrut kimi əhəmiyyəti daha da artıb.
