BAKI,VOA,Yusif Şərifzadə
Qəzza zolağında atəşkəs elan edilməsindən sonra İsrail ordusunun hücumları nəticəsində ölənlərin sayının 1 122 nəfərə çatdığı bildirilib. Fələstin tərəfi atəşkəs dövründə minlərlə pozuntunun qeydə alındığını açıqlayıb.
VOA xəbər verir ki, Qəzza Hökumətinin Media Ofisi İsrail ordusunun oktyabr ayında qüvvəyə minən atəşkəsdən sonra bölgədə 3 689 pozuntu həyata keçirdiyini bildirib.
Açıqlamada qeyd olunub ki, atəşkəsin elan edilməsindən sonra İsrail ordusunun hücumları nəticəsində 1 122 nəfər həlak olub, 3 599 nəfər isə yaralanıb.
Məlumata görə, Qəzzada atəşkəs 2025-ci il oktyabrın 10-da ABŞ vasitəçiliyi ilə əldə olunan razılaşmadan sonra qüvvəyə minib.
Qəzza Hökumətinin Media Ofisi İsrailin hərbi əməliyyatlarının davam etdiyini və atəşkəs razılaşmasının şərtlərinin pozulduğunu iddia edib.
Atəşkəs razılaşması bölgədə uzunmüddətli sakitliyin təmin olunması və humanitar vəziyyətin yaxşılaşdırılması məqsədi daşıyırdı.
Lakin tərəflər arasında qarşılıqlı ittihamlar davam edir və Qəzza zolağında təhlükəsizlik vəziyyəti beynəlxalq ictimaiyyətin diqqətində qalır.
