BAKI,VOA,Yusif Şərifzadə

İsrailin Qəzza zolağına qarşı həyata keçirdiyi hərbi əməliyyatlar nəticəsində ölənlərin sayı 73 min 246 nəfərə yüksəlib.

VOA xəbər verir ki, Fələstinin Wafa xəbər agentliyinin tibbi mənbələrə istinadən yaydığı məlumata görə, 2023-cü il oktyabrın 7-dən indiyədək Qəzza zolağında azı 73 min 246 nəfər həyatını itirib.

Məlumatda bildirilir ki, yaralananların sayı isə 173 min 727 nəfərə çatıb.

Tibbi mənbələrin məlumatına əsasən, 2025-ci ilin oktyabr ayında əldə olunmuş atəşkəs razılaşmasına baxmayaraq, Qəzza zolağında hərbi əməliyyatlar davam edir.

Bildirilir ki, həmin tarixdən bu günədək baş verən hücumlar nəticəsində daha 1 123 nəfər ölüb, 3 616 nəfər isə müxtəlif dərəcəli bədən xəsarətləri alıb.

İsrail tərəfi açıqlanan itkilərlə bağlı məlumatlara hələlik münasibət bildirməyib.

Qəzza zolağında humanitar vəziyyət ağır olaraq qalır və beynəlxalq təşkilatlar bölgədə mülki əhalinin müdafiəsi ilə bağlı narahatlıqlarını davam etdirirlər.