BAKI,VOA Orxan Qədirzadə
İsrail Ordusu (IDF) Qəzza zolağında müharibə zamanı öldürülən 12 fələstinli futbolçu, məşqçi və hakimdən ibarət şəxslərin silahlı qruplaşmaların üzvü olduğunu iddia edib.
Ordunun açıqlamasına görə, siyahıda yer alan şəxslər arasında FIFA tərəfindən qeydiyyatdan keçmiş beynəlxalq köməkçi hakim Məhəmməd Sami Məhəmməd Xəttab da var. İsrail tərəfi onun Fələstinin “İslami Cihad” təşkilatının hərbi qanadının üzvü olduğunu bildirib.
IDF açıqlamasında qeyd edib ki, bu məlumatlar Qəzzanın futbol ictimaiyyətinin qəsdən hədəfə alınması ilə bağlı yayılan iddialara cavab olaraq açıqlanıb.
“İsrail Müdafiə Ordusu təqdim olunan şəxslərin sadəcə futbolçu və mülki şəxslər olmadığını, əslində HƏMAS və “İslami Cihad”ın hərbi qanadlarında fəaliyyət göstərən şəxslər olduğunu açıqlayır”, - deyə ordunun bəyanatında bildirilib.
İsrail ordusu siyahıda adı çəkilən şəxslərdən bəzilərinin silahlı qruplaşmalarda komandanlıq vəzifələri tutduğunu, digərlərinin isə döyüşçü kimi fəaliyyət göstərdiyini iddia edib.
Ordunun məlumatına görə, Məhəmməd Xəttab əvvəllər futbolçu kimi təqdim olunub, lakin onun “İslami Cihad”ın Mərkəzi Düşərgələr Briqadasında fəaliyyət göstərdiyi irəli sürülüb.
IDF Xəttaba aid üç foto yayımlayıb. Fotolardan birində onun FIFA və Asiya Futbol Konfederasiyasının loqoları olan futbol geyimində, digər görüntülərdə isə qara geyimdə və silahla göründüyü bildirilib.
İsrail ordusu həmçinin qeyd edib ki, bəzi futbol təşkilatları, o cümlədən Asiya Futbol Konfederasiyası onun ölümü ilə bağlı başsağlığı mesajları yayıb.
Açıqlamada adı çəkilən 12 şəxsdən ən azı ikisinin 2023-cü il oktyabrın 7-də İsrailə qarşı həyata keçirilən hücumlarda iştirak etdiyi də iddia olunub.
“Bəzi məlumatlar açıq mənbələrdən əldə edilib. Siyahıda göstərilən bütün şəxslər İsrail Müdafiə Ordusu tərəfindən terror təşkilatları ilə əlaqəli şəxslər kimi müəyyən edilib”, - deyə açıqlamada vurğulanıb.
Fələstin Futbol Assosiasiyası isə İsrail ordusunun ittihamlarını rədd edib.
Assosiasiyanın Qəzzadakı nümayəndəsi İsrailin futbolçuların, məşqçilərin, hakimlərin və klub əməkdaşlarının öldürülməsi ilə bağlı ittihamları ört-basdır etmək üçün “saxta iddialardan” istifadə etdiyini bildirib.
O qeyd edib ki, siyahıda adı çəkilən şəxslərin əksəriyyəti İsrailin hava hücumları və reydləri nəticəsində öz evlərində və ya düşərgələrdə, bəziləri isə ailə üzvləri ilə birlikdə həlak olub.
Fransanın AFP agentliyi İsrail ordusunun irəli sürdüyü ittihamları müstəqil şəkildə təsdiqləyə bilmədiyini bildirib. HƏMAS və “İslami Cihad” isə məsələ ilə bağlı dərhal açıqlama verməyib.
Müharibə başlayandan etibarən Fələstin futbol qurumları İsraili Qəzzada futbolçuları öldürməkdə və idman infrastrukturuna zərər vurmaqda ittiham edir.
İsrail isə mütəmadi olaraq yalnız silahlı şəxsləri və hərbi infrastrukturu hədəf aldığını bildirir, HƏMAS və digər qruplaşmaların isə mülki ərazilərdən fəaliyyət göstərdiyini iddia edir.
