BAKI, AzerVoice
Suriyalı nazir ABŞ sanksiyalarının ləğvi xəbərini canlı yayımda göz yaşları ilə qarşılayaraq, Türkiyəyə xüsusi əhəmiyyətli rolu üçün təşəkkür edib.
AzerVoice xəbər verir ki, Suriyanın
İqtisadiyyat naziri Nidal əl-Şar ABŞ-ın ölkəsinə qarşı tətbiq
etdiyi sanksiyaların ləğv olunacağı xəbərini canlı yayımda eşidərək
göz yaşlarını saxlaya bilməyib.
Nazir çıxışı zamanı bu qərarın qəbuluna təsir edən ölkələrə –
Türkiyə, Səudiyyə Ərəbistanı və Qətərə təşəkkürünü bildirib.
Əl-Şar həmçinin ABŞ prezidenti Donald Trampa da minnətdarlıq edərək onun Körfəz turu çərçivəsində Ər-Riyadda verdiyi açıqlamanı xatırladıb. Tramp çıxışında Türkiyə Prezidenti Rəcəb Tayyib Ərdoğanla telefon danışığından bəhs edərək, "Ərdoğan və digər hörmətli dostlarımız Suriyaya qarşı sanksiyaların ləğvini istədilər. Biz bu sanksiyaları aradan qaldıracağıq" – deyə bildirmişdi.
Qeyd edək ki, ABŞ dövlət katibi Marko Rubionun bu həftə Türkiyədə Suriyanın yeni xarici işlər naziri Əsəd Həsən Şeybani ilə görüşəcəyi gözlənilir. ABŞ və Suriya arasında bu görüş, sanksiyaların ləğvindən sonra diplomatik əlaqələrin bərpası istiqamətində atılan ilk addım kimi qiymətləndirilir.
