BAKI, AzerVoice

İranla razılaşma yalnız “sərt nəzarət” əsasında mümkündür.

AzerVoice xəbər verir ki, Beynəlxalq Atom Enerjisi Agentliyi (International Atomic Energy Agency, qısaca BAEA ) direktoru Rafael Qrossi, Tehranla mümkün razılaşmanın yalnız İranın nüvə proqramının “sərt nəzarətə” tabe olması şərti ilə reallaşa biləcəyini bildirib.

Qrossi İran və ABŞ arasında davam edən danışıqları “müsbət siqnal” kimi qiymətləndirsə də, konkret razılaşmanın əldə ediləcəyi ilə bağlı qəti fikir bildirməkdən imtina edib. Onun sözlərinə görə, BAEA uranın zənginləşdirilməsi ilə bağlı fikir ayrılıqlarını aradan qaldırmaq üçün hər iki tərəfə təkliflər təqdim edib, lakin bu fərqliliklərin hələ də qalmaqda davam etdiyini vurğulayıb.

İranın Atom Enerjisi Təşkilatının rəhbəri Məhəmməd İslami qeyd edib ki, ABŞ-la razılaşma olacağı təqdirdə, amerikalı müfəttişlərin BAEA nümayəndələri ilə birlikdə ölkəyə daxil olmasına icazə verilə bilər. Xarici işlər naziri Abbas Arakçi isə ABŞ-ın İranın zənginləşdirmə fəaliyyətini dayandırmaq tələbini müdafiə edən britaniyalı diplomatı sərt şəkildə tənqid edib.

Qeyd edək ki, İran 2015-ci il nüvə sazişindən sonra öhdəliklərini mərhələli şəkildə azaldaraq uran zənginləşdirmə səviyyəsini artırıb. Bu isə beynəlxalq ictimaiyyətin və BAEA-nin ciddi narahatlığına səbəb olub.