BAKI, AzerVoice
ABŞ dövlət katibi Marko Rubio bildirib ki, Rusiya ilə Ukrayna arasında gedən müharibənin dayandırılması üçün tərəfləri danışıqlara təşviq etməyə davam edəcəklər.
AzerVoice xəbər verir ki, Rubio bu fikirləri NATO Zirvəsi çərçivəsində Niderlandın Haaqa şəhərində verdiyi müsahibədə səsləndirib.
O, ABŞ-ın İranda yerləşən üç nüvə obyektinə hücumu, NATO-nun gündəliyi və Rusiya-Ukrayna müharibəsi ilə bağlı fikirlərini bölüşüb.
“Bu il əvvəldən bəri 80 mindən çox Rusiya hərbçisi həyatını itirib. Ukraynanın itkiləri isə daha azdır. Biz bu münaqişənin başa çatmasını istəyirik. Bu qanlı, dağıdıcı və mənasız bir müharibədir. Ancaq tərəflər hələ də irəliləyiş istədiklərini göstərmirlər. Buna görə də danışıqlara çağırışlarımızı davam etdirəcəyik” – deyə Rubio vurğulayıb.
ABŞ rəsmisi əlavə edib ki, bəzi ölkələr Rusiyaya qarşı daha sərt sanksiyalar tətbiq edilməsini tələb edirlər.
“Əgər Rusiyaya hamının istədiyi kimi daha çox sanksiya tətbiq etsək, onları tam əzmiş olarıq və bu zaman atəşkəslə bağlı danışmaq imkanımızı itirə bilərik”- deyə Rubio qeyd edib.
