Bakı, AzerVoice

ABŞ prezidenti Donald Tramp Qəzza zolağında atəşkəsin davamlılığını təmin etmək üçün diplomatik addım atır.

AzerVoice xəbər verir ki , Yaxın Şərq üzrə xüsusi nümayəndəsi Stiv Vitkoff atəşkəsin ikinci mərhələsini müzakirə etmək məqsədilə İsrailə səfər edəcək.

Yanvarın 19-da qüvvəyə minən atəşkəs İsrail və Həmas arasında müharibənin dayandırılması üçün vacib bir addım olsa da, bu razılaşmanın uzunmüddətli davamlılığı ilə bağlı narahatlıqlar qalır. ABŞ prezidenti Tramp bu vəziyyəti "Onların müharibəsi" ifadəsi ilə şərh etsə də, bölgədə sülhü qorumaq üçün diplomatik dəstəyi təmin etməyi vacib hesab edir.

Məlumata görə, Stiv Vitkoffun səfəri gələn həftə başlayacaq və onun ilk dayanacağı Səudiyyə Ərəbistanı olacaq. Daha sonra o, İsrailə gedərək Təl-Əviv və Həmas arasında atəşkəs razılaşmasının ikinci mərhələsinə dair danışıqlarda iştirak edəcək.

Vitkoff həmçinin İsrail ordusunun Qəzzadakı Netzarim və Filadelfiya dəhlizində apardığı "təftişə" qatılacağını açıqlayıb.

Qeyd edək ki, vasitəçi ölkələrdən biri olan Qətərin yanvarın 15-də elan etdiyi üç fazalı atəşkəs razılaşması bölgədə uzun müddətdir gözlənilən bir sülh mühitinin formalaşmasına ümid yaradır. Razılaşmanın birinci mərhələsində, ilk 42 gün ərzində 33 israilli və 1900-dən çox fələstinli məhbus azad ediləcək.

Həmçinin, Yanvarın 19-da Həmas-ın hərbi qanadı İzzəddin əl-Qəssam Briqadaları tərəfindən üç israilli qadın azad edilib.

İsrail həbsxanalarında saxlanılan 90 fələstinli isə İordan çayının qərb sahilindəki Ofer hərbi həbsxanasından sərbəst buraxılıb.