Bakı, AzerVoice

ABŞ prezidenti Donald Tramp, nəzarəti geri almaq istədiyi Panama kanalında son bir ildə ticarət gəmilərinin keçidində əhəmiyyətli artım olduğunu bildirib.

AzerVoice xəbər verir ki, Atlantik və Sakit okeanları birləşdirən Panama kanalında son illərdə quraqlıq səbəbindən ticarət gəmilərinin hərəkətinə məhdudiyyətlər qoyulmuşdu. Lakin iqlim şəraitinin qismən yaxşılaşması və ticarət marşrutlarının dəyişməsi nəticəsində kommersiya gəmilərinin keçidində nəzərəçarpacaq artım qeydə alınıb.

Məlumata görə, 2024-cü ilin yanvar ayında kanaldan 632 ticarət gəmisi keçib. Aylıq keçidlər tədricən artaraq 2025-ci ilin yanvarında 948-ə yüksəlib. Beləliklə, Panama kanalında gəmi hərəkəti 2024-cü ilin yanvarı ilə müqayisədə 50 faiz artıb.

Ümumilikdə, 2024-cü ilin yanvarından 2025-ci ilin yanvarına qədər kanaldan 9377 ticarət gəmisi keçib.

Baxmayaraq ki, ümumi gəmi hərəkəti ötən il ərzində yaxşılaşıb, o, hələ də 2019-2022-ci illərin orta göstəricisindən aşağıdır.

Panama kanalının ən böyük istifadəçiləri ABŞ, Çin, Çili, Yaponiya və Cənubi Koreyadır. Panama kanalı ilə Çinə gedən yüklər ABŞ-dakı yükün dörddə birini təşkil edir.

Qeyd edək ki, Panama kanalı 1903-cü ildə ABŞ tərəfindən inşa edilib və 1914-cü ildə istifadəyə verilib. 1977-ci ildə ABŞ və Panama arasında kanalın birgə idarə olunması haqqında müqavilə imzalanıb, 1999-cu ildə isə tam nəzarət Panamaya keçib.

Prezident Donald Tramp, ABŞ-ın kanalı tikmək üçün külli miqdarda vəsait və insan həyatı itirdiyini, lakin sonda Panamaya təhvil verdiyini bildirib.

O, Panamanın kanalı faktiki olaraq Çinə verdiyini iddia edərək, "Kanalı Çinə vermədik, Panama verdi. İndi onlar Çin işarələrini yığışdırmağa çalışırlar, amma 70 faizi hələ də yerindədir. Bu, bizim razılaşmamız deyildi. Ona görə də biz onu geri alacağıq." - deyə bildirib.