BAKI, AzerVoice
Myanmada baş verən zəlzələ nəticəsində həyatını itirənlərin sayı üç min nəfəri keçib.
AzerVoice xəbər verir ki, bu barədə Myanma dövlət televiziyası məlumat yayıb.
İlkin məlumata görə, zəlzələ nəticəsində 3003 nəfər ölüb, 4515 nəfər yaralanıb, 351 nəfər isə itkin düşüb.
Qeyd edək ki, zəlzələ martın 28-də 7,7 bal gücündə qeydə alınıb. Ağır dağıntılar nəzərə alındıqda tələfatın 10 mini keçə biləcəyi ehtimal edilir.
Zəlzələ həmçinin Taylandın paytaxtı Banqkokda da hiss olunub.
Həmçinin xatırladaq ki, Myanma hökuməti martın 31-dən aprelin 6-dək ölkədə milli matəm elan edib və zəlzələdə həlak olanların xatirəsinə bayraqlar yarıya endirilib.
