BAKI, AzerVoice
ABŞ-da yeni din azadlığı komissiyası yaradılır.
AzerVoice xəbər verir ki, ABŞ prezidenti Donald Tramp Ağ Evdə keçirilən mərasimdə yeni “din azadlığı komissiyası”nın yaradılacağını elan edərək ölkədə dünyəvilik prinsiplərinə qarşı çıxış edib.
Üç İbrahimi dinin nümayəndələrinin iştirak etdiyi mərasimdə Tramp 2025-ci ilin fevral ayında fəaliyyətə başlayacaq yeni komissiyanın məqsədinin bütün inanc qruplarının ibadət azadlığını qorumaq olduğunu bildirib. O, eyni zamanda antisemitizmlə mübarizədə komissiyanın fəal rol oynayacağını vurğulayıb və 2024-cü ilin iyulunda qarşılaşdığı sui-qəsd cəhdindən sağ çıxmasını “Allahın işi” adlandırıb.
Trampın “Biz dini ölkəmizə qaytardıq” və “bir müddət kilsə ilə dövlətin ayrılmasını unudaq” kimi ifadələri ABŞ-da dünyəvilik prinsipləri ilə bağlı geniş müzakirələrə səbəb olub. Demokratlar və bəzi hüquq ekspertləri bu komissiyanın digər inanc qruplarını kənarda saxlaya biləcəyindən və konstitusiya ilə ziddiyyət təşkil edə biləcək addımlar atacağından narahatlıq bildirirlər.
Komissiyaya Texas ştatının leytenant qubernatoru Den Patrikin rəhbərlik edəcəyi açıqlanıb. Rəsmi açıqlamalarda komissiyanın məqsədinin inanc azadlığını gücləndirmək olduğu bildirilsə də, Trampın əvvəlki siyasətləri — xüsusən abort və immiqrasiya ilə bağlı mövqeyi — yeni qurumun inklüzivliyi ilə bağlı suallar doğurur.
Qeyd edək ki, bəzi dairələr bu təşəbbüsün ABŞ-da mühafizəkar xristian dəyərlərinə əsaslanan “Layihə 2025” ilə əlaqəli ola biləcəyini iddia etsə də, Tramp bu ehtimalları təkzib edib.
