BAKI, AzerVoice
ABŞ Prezidenti Donald Tramp bəyan edib ki, müəyyən mərhələdə Çindən idxal edilən mallara tətbiq edilən gömrük rüsumlarını azaldacaq.
AzerVoice xəbər verir ki, bu barədə o "NBC News" telekanalına verdiyi müsahibədə bildirib.
Onun sözlərinə görə, bu addım atılmazsa, Vaşinqtonla Pekin arasında ticarət münasibətləri mümkün olmayacaq. Tramp bu fikirləri səsləndirərək konkret vaxt çərçivəsi göstərməyib.
“Bir vaxt gələcək ki, onları (rüsumları) azaldacağam, çünki əks halda onlarla biznes qura bilməyəcəyik”.
O qeyd edib ki, Çin ABŞ-la ticarət əlaqələrini davam etdirməyə çox ciddi şəkildə maraqlıdır, çünki Trampın sözlərinə görə, Çinin iqtisadi vəziyyəti hazırda çox pisdir.
Xatırladaq ki, Tramp aprelin 2-də 185 ölkə və əraziyə aid məhsullara gömrük rüsumları tətbiq edildiyini elan etmişdi. Ümumi tariflər aprelin 5-də 10 faiz səviyyəsində qüvvəyə minib, fərdi tariflər isə aprelin 9-da tətbiq edilib. Daha sonra Tramp bəzi ölkələr və ərazilərə qarşı qarşılıqlı əsasda tətbiq edilən əlavə idxal rüsumlarının 90 günlük dayandırıldığını açıqlayıb. Ağ Ev bu fasilənin ticarət danışıqları ilə əlaqəli olduğunu izah edib və bu müddətdə ümumi 10 faizlik tarif qüvvədə qalacaq. Eyni zamanda Tramp Çin məhsullarına tətbiq olunan tarifləri 125 faizə qədər artırıb. Bundan əvvəl isə Kanada, Çin və Meksika hökumətlərinin ABŞ-a fentanil qaçaqmalçılığı ilə mübarizədə kifayət qədər səy göstərmədikləri iddiası ilə əlavə 20 faizlik tarif tətbiq edilmişdi. Hazırda ABŞ-ın Çin məhsullarına tətbiq etdiyi ümumi tariflər 145 faizə çatır. Cavab olaraq Çin aprelin 12-dən etibarən ABŞ məhsullarına tətbiq etdiyi tarifləri 125 faizə qaldırıb.
