BAKI, AzerVoice
Avropa İttifaqının (Aİ) sabiq Xarici Siyasət və Təhlükəsizlik üzrə Ali Nümayəndəsi Josep Borrell İsrailin Qəzzadakı hərbi əməliyyatlarını sərt şəkildə tənqid edib. O, baş verənləri İkinci Dünya Müharibəsindən bəri ən böyük etnik təmizləmə kimi xarakterizə edib və Qəzzaya atılan bombaların yarısının Aİ tərəfindən təmin edildiyini bildirib.
AzerVoice xəbər verir ki, Borrell bu fikirləri İspaniyada yerləşən Yuste Manastırında keçirilən tədbirdə – 9 May Avropa Günü ilə eyni tarixdə təşkil olunan V Karlos Avropa Mükafatını alarkən söyləyib. Mükafatı İspaniya kralı VI Felipe şəxsən təqdim edib.
“Filistinlilər qətlə yetirildikdən sonra həmin ərazidə istirahət mərkəzi qurmaq üçün həyata keçirilən bu plan, İkinci Dünya Müharibəsindən sonra baş verən ən böyük etnik təmizləmədir,” – deyə Borrell qeyd edib. O, Qəzzadakı hadisələrin soyqırım tərifinə uyğun gəldiyini bildirib və Avropa İttifaqını laqeyd davranmaqda ittiham edib: “Qəzzaya düşən bombaların yarısını biz veririk.”
Avropanın gənc nəsillərinə çağırış edən Borrell, maliyyə və hərbi inteqrasiyanın təxirə salınmadan həyata keçirilməsinin vacibliyini vurğulayıb: “Əks təqdirdə, Avropa sivilizasiyası Donald Trump və Vladimir Putin kimi fiqurların bizi uçuruma aparacağı xaotik dünyada mövcudluğunu davam etdirə bilməyəcək.”
İspan diplomat əlavə edib ki, Avropanın gələcəyi artıq öz daxilindəki sülh deyil, qlobal münasibətləri düzgün şəkildə yönəltməkdən asılıdır. O, həmçinin Aİ-nin Rusiyanın Ukraynadakı işğalına qarşı vaxtında yetərli silah dəstəyi verməməsini də sərt tənqid edib.
