BAKI, AzerVoice
ABŞ Prezidenti Donald Tramp, Qrenlandiyanın istənilən yolla Birləşmiş Ştatlara qoşulması ideyasına sadiq olmağa davam edir.
AzerVoice xəbər verir ki, bu barədə Ağ Evin mətbuat katibi Kerolayn Livitt məlumat verib.
"Prezident Tramp hələ də Qrenlandiyanın Arktikadakı strateji əhəmiyyətini müdafiə edir. O, bu regionda milli təhlükəsizlik maraqlarını irəli aparmaq üçün Qrenlandiyanı istənilən mümkün yolla əldə etmək ideyasına sadiq qalır" – deyə, Livitt bildirib.
Tramp daha öncə dəfələrlə Qrenlandiyanın ABŞ-a qoşulmalı olduğunu bildirib. Qeyd edək ki, Qrenlandiya Danimarka Krallığına daxil olan muxtar ərazidir. Bu ilin mart ayında keçirilən parlament seçkilərində adanın müstəqilliyi əsas mövzulardan biri olub. İctimai rəy sorğularına əsasən, əhalinin əksəriyyəti bu istəyi dəstəkləsə də, onlar hələ müstəqilliyin nə vaxt və necə əldə ediləcəyinə dair qərar verməyiblər. Yanvar ayında keçirilən sorğuda isə yalnız 6 faiz iştirakçı Qrenlandiyanın ABŞ-a qoşulmasının tərəfdarı olduğunu bildirib.
Həmçinin xatırladaq ki, Tramp bu ayın əvvəlində "NBC News" kanalına verdiyi müsahibədə, məsələnin hərbi güclə həll olunmasını istisna etmədiyini bəyan edib. ABŞ-ın vitse-prezidenti Cey Di Vens isə mart ayının sonunda bəyan edib ki, Vaşinqton Qrenlandiyanın müstəqillik əldə edib sülh yolu ilə ABŞ-a birləşəcəyinə ümid edir. Vensin sözlərinə görə, bu məsələ ilə bağlı ABŞ-ın hərbi gücdən istifadə etməklə təhdid planı yoxdur.
