BAKI, AzerVoice

Şimali İrlandiyanın “Kneecap" adlı rep qrupunun üzvü Liam Ohana Londonda keçirilən konsert zamanı “Hizbullah” bayrağı qaldırdığı üçün terrorçuluqla əlaqəli cinayətdə ittiham olunub.

AzerVoice xəbər verir ki, bu barədə London polisinin verdiyi açıqlamada bildirilib.

Açıqlamaya əsasən, ifaçı 2023-cü ilin noyabrında Londondakı “O2” konsert zalında çıxış edərkən, "Hizbullah"ı dəstəklədiyinə dair şübhələr doğuracaq şəkildə bir bayraq qaldırıb. Bu isə Birləşmiş Krallığın 2000-ci il Terrorizm Qanununa əsasən cinayət sayılır.

Liam Ohana – səhnə adıyla Mo Chara – 18 iyun tarixində Londonda məhkəmə qarşısına çıxarılacaq.

Qeyd edək ki, Böyük Britaniya “Hizbullah”ı rəsmi şəkildə terror təşkilatı kimi tanıyır.

Məlumat üçün bildirək ki, üç nəfərdən ibarət “Kneecap" qrupu fələstinlilərə açıq dəstəyilə tanınan musiqiçilərdən ibarətdir. Qrup xüsusilə ABŞ-ın Kaliforniya ştatında keçirilən “Coachella” musiqi festivalında İsraili Qəzzada fələstin xalqına qarşı soyqırımı törətməkdə ittiham etdikdən sonra kəskin tənqidlərə məruz qalıb.

Bundan sonra sosial mediada yayılan müxtəlif videolarda qrup üzvlərindən birinin səhnədə “Hadi HƏMAS! Hadi Hizbullah!” deyə qışqırdığı anlar da böyük reaksiyaya səbəb olub.

Ötən ilin may ayının əvvəlində Britaniya Antiterror Polisi bu videolarda mümkün cinayət əlamətlərinin olduğunu bildirərək istintaqa başlayıb.

“Biz nə "HƏMAS"ı, nə də "Hizbullah"ı dəstəkləmişik və heç vaxt dəstəkləməmişik. Bu ittihamı qətiyyətlə rədd edirik və özümüzü sonadək müdafiə edəcəyik. Qəzzada 14 min uşaq aclıqdan ölmək üzrədir, amma diqqət yenidən bizə yönəlib” - deyə, qrupun üzvləri bildiriblər.

Son həftələrdə qrup Cənubi İngiltərədə bir festivaldan uzaqlaşdırılıb, eləcə də Almaniyada sentyabr ayında planlaşdırılan bir neçə konserti ləğv edilib.

Britaniya Yəhudiləri Deputatlar Şurası ölkədə məşhur olan “Glastonbury” festivalının təşkilatçılarını iyun ayının sonunda planlaşdırılan “Kneecap" konsertini də ləğv etməyə çağırıb.