BAKI, AzerVoice
Beynəlxalq Cinayət Tribunalı Banqladeşin sabiq baş naziri Şeyx Hasina və keçmiş daxili işlər naziri Asaduzzaman Xan Kamalın həbsinə order verib.
AzerVoice xəbər verir ki, bu barədə “Dhaka Tribune” qəzeti məlumat yayıb.
Məlumata əsasən, onlar keçən ilin iyul-avqust aylarında baş vermiş kütləvi etirazlar zamanı törədilmiş insanlığa qarşı cinayətlərdə ittiham olunurlar. Həmin etirazlar nəticəsində yüzlərlə tələbə və mülki şəxs həyatını itirmişdi.
Məhkəmə Şeyx Hasina, Asaduzzaman Xan Kamal və sabiq polis rəisi Abdulla əl-Mamuna qarşı irəli sürülmüş ittihamları qəbul edib. İş üzrə növbəti iclasın iyunun 16-da keçiriləcəyi bildirilib.
İttiham tərəfi bildirir ki, Şeyx Hasina kütləvi qətllərin təşkilatçısı olub və təhlükəsizlik qüvvələrinə, eləcə də o dövrdə hakimiyyətdə olan “Avami Liqa” partiyasının fəallarına etirazları zor gücü ilə yatırtmaq barədə birbaşa göstəriş verib. Prokurorluq 81 nəfərlik şahid siyahısı təqdim edib və bu şəxslərin hər biri ittiham olunanlara qarşı ifadə verməyə hazırdır. Məhkəmə prosesinin bir neçə ay davam edəcəyi gözlənilir.
Sabiq baş nazirə qarşı məhkəmə iclasları Banqladeşin dövlət televiziyasında birbaşa yayımlanıb və bu proses ictimaiyyətdə böyük rezonansa səbəb olub. Bu məhkəmənin özəlliyi ondadır ki, onu 2009-cu ildə elə Şeyx Hasina özü 1971-ci il müharibə cinayətlərini araşdırmaq üçün yaratmışdı. İndi isə həmin instansiya məhz ona qarşı ittihamları araşdırır.
Keçən il avqustun 5-də anti-hökumət etirazları fonunda Şeyx Hasina istefa verərək Hindistana qaçmışdı. Ona qarşı keçirilən aksiyalarda əsasən işsizlik və gələcək perspektivlərin olmamasından narazı olan tələbələr iştirak edirdi. İyul və avqust aylarında Banqladeşin müxtəlif şəhərlərində baş verən toqquşmalarda təxminən min 400 nəfər həlak olmuşdu. Avqustun 8-də isə ölkədə keçid hökuməti formalaşdırıldı və baş nazir postuna Nobel Sülh Mükafatı laureatı Məhəmməd Yunus gətirildi. Banqladeş hakimiyyəti artıq Şeyx Hasinanın məsuliyyətə cəlb edilməsi üçün onun ekstradisiyasını rəsmi şəkildə tələb edib.
